Vawiin khan Mizoram State Anti-Tobacco Day Vawi-5 hmanna leh Primary School chunglamte Vaihlo, Zu leh damdawi hmansualna laka himna tura hmalakna Project-HIMNA MADAT (Mizoram Against Drugs, Alcohol and Tobacco) bultanna chu Champhai District Tobacco Control Cell buatsaihin Govt. Champhai College Seminar Hall-ah neih a ni a. He hunah hian Pu Abraham Beirazi Khithie, SDO Sadar, Champhai chu khuallian niin Project- HIMNA MADAT a kick-off a ni.

Khuallian chuan Mizo-te zingah mi ngaihsam tak a hnu leh dawn lova thil tih mai ching an awm thin a, rei lo te chhung  nawmna  duh avangin ruihhlo  tem chhinin bawihah an tang a, hei vang hian Mizote zingah ruihhlo a lo hluar phah  a ni, a ti a. Ruihhlo leh a kaihhnawih ti tawh reng reng chuan sim har an ti a, senso a tam avangin ram economy a tichhia a, hnam a chhiat phah mai bakah hnamdang ten min hmuhsit phah thin thu a sawi a. Ruihhlo chuan chhungkaw boruak a tichhia a, chhungkaw tlakranna a thlen thin a ni, a ti a. Hnam changkang zawk te kan ngaisang a, an in vawn thianghlim dan erawh zir kan tum lo thin chu pawi a tih thu sawiin a thalam apiang chu entawn zel chin a tha a ni, a ti a. Kalkhawmte hnenah chuan zuk leh hmuam emaw ruihhlo kan tih loh hi a Pathian thu em em a ni tiin Project-HIMNA MADAT hi a kick off a ni.

Mizoram State Anti-Tobacco Day vawi 5 na puala hun hman leh Project HIMNA MADAT Kick-off na hun hi Pu Thamawia Bawlchhim chuan a kaihruai a. Rev. Jonathan Pachuau chuan ‘Inchhung leh lirthei chhungah mei zuk loh’ tih thupui hmangin thu a sawi a. He hunah hian Anti Tobacco Club-te hnen atangin COTPA 2003 chungchang inzirtirna hun hman niin, Pu C. Zaihmingthanga chuan lawmthu sawiin hun a khar a ni.