Vawiin hian Serchhip Hmar Veng YMA Hall ah Food and Drugs Administration, Serchhip buatsaihin Damdawi lem leh ruihhlo chungchang leh ei tur thianghlim lo chungchang inhrilhhriatna leh inrawn khawmna buatsaih a ni a. Directorate of Health Services, FDA Wing mithiamten hun an hmang.

He hunah hian Pu Lalsawma Pachuau, Jt. Director, Food & Drugs Administration chu khuallian niin, Pu K. Saitluanga, DIPRO Serchhip chu khualzahawm a ni a. Khuallian Pu Lalsawma Pachuau chuan, kan rama Food & Drugs lama dan bawhchhiatna hi a nasa em em a, a bawhchhetute lah hi keimahni chhunga mite deuh vek hi an ni. Damdawi lem lei leh hralh avanga kan sum leh pai riral nasat zia te, nunna hial chan theih a nih dan te, ruihhlo avanga kan thalaite an liam nasat ziate, eitur thianghlim tawklo avanga kan hloh nasat ziate hi hrechiang ila chuan he dan bawhchhiatna leh bawhchhetute hi kan do nasa ngei ngei ang, a ti a. Mipuiten tangrual taka heng dan bawhchhiatnate kan do tlan chuan nasa takin hma kan sawn ngei ngei dawn a, chuvang chuan thawhpuiah vawiina lokal khawmte Serchhip khawtlang aiawh kan hruaitute leh ram mipuite kan sawm a ni, a ti.

Khualzahawm Pu K. Saitluanga pawhin thusawiin, Mizote chu kan ei leh in lama kan fimkhur tawk loh vangte, zuk leh hmuam kan tih nasat lutuk vangtein kan zam a zala, ram changkang zawka mite nena khaikhinin phurna leh thathona lamah kan tluk lo hle nia a hriat thu a sawi a. Chumi rah chhuah chu hnathawk tlak lova chakloh thuaina leh dam rei lohna te a ni, a ti. A ngawl kan vei thil thalo kan ei-in zawng zawng hi tuman min barh lui lova, keimahni kut ngeia kan inbarh an ni deuh vek a, keimahni mawh theuh a ni, a ti bawk.

He hunah hian Pi Sarah Laldintluangi, Asst. Director, Serchhip FDA chuan kum 2015 atanga vawiin thlenga FDA Serchhip hmalak dan tlangpui a tarlanga; report atanga a lan danin Serchhip District ah Drugs License hi 166 awmin, an zinga 148 chu restricted licence a ni a, 14 hi General retail, 1 hi wholesale. Homoeopathic hi 3 awmin invalid 27, cancelled 8 a awm a ni. Tin, 2017-18 chhungin License thar hi 22 pek an ni bawk.  District chhungah damdawi sample hi 57 laa endik an ni a, an zinga pakhat hi a nih tur ang nip ha lo (NSQ) a ni. Food License hi mi 5 chauhvin an la la a, Food Registration erawh 127 a awm tawh a ni. He mi hnu hian Pu F. Lalliantluanga, Dy. Director, FDA chuan Drugs Control chungchanga Mizoram dinhmun leh Food Safety chungchang zirtirna a pe zui a. Chumi hnuah kal khawm te hian hmalak ho dan tur te, an hriat duh leh sawi duh an neih hrang hrangte sawina hun an hmanga ni.

Vawiina Awareness cum Consultative meeting hi Dr. Laldawngliana Sailo, Chief Medical Officer, Serchhip in a kaihruaia, Serchhip khaw chhunga Village Council hrang hrang aiawh, Branch YMA aiawh, MHIP aiawh, chanchinbumite leh mi dang engemawzat an tel a ni.