Vawiin khan Horticulture Minister Pu P.C.Lalthanliana chuan ama office chamber-ah Horticulture Department leh Central YMA te tangkawpa hmalakna leh thawhhona kal zelah ‘Thlai Venhimna Damdawi Him leh Dik Taka Hmandan’ (Safe and Judicious Use of Pesticides) tih inzirtirna bute (booklet) Horticulture Department mithiamten an buatsaih chu a tlangzarh.

He booklet tlangzarhna inkhawm Horticulture Secretary Pu Rodney L.Ralte kaihhruaiah Horticulture Minister Pu P.C.Lalthanliana chuan ram hmasawnnain a ken tel avangin leh thlai chin lama hma kan sawn zel avangin thlai venhimna damdawite hi a hman lo thei lova, amaerawhchu mihringte tana a him tawka hman dan tur leh dik taka kan hman loh thin avangin harsatna kan tawk fo thin chu pawi a tih thu a sawi. Mihring hriselnain a tawrh theih avang leh nunna chan hial te an lo awm tak avangin sorkar chuan hetiang kawnga inzirtirna hi kan mamawh takzet a ni tih hriain Central YMA te nen tangrualin hma a la zel a; hmanhmawh takin Department lamin huan/loneitute tana lehkhabu an siam thei chu a lawmawm takzet a ni, a ti. Horticulture Department chuan thlai damdawi/hlo tur ‘pesticides’ hman dan tur inzirtirna Farmers’ Training an huaihawt thin chung pawhin a tam zawk chuan Zopa rilru tak puin hmana pipu te tihdan chhawm tlat an la awm hian Department hmalakna a tihlawhchham thin fova; chu bakah thlai damdawi ang ni lovin lui sangha te, chakai te pawh an lo hrai thin chuan an tum piah lamah lui chhunga thilnung leh a bul vela thlai/thinghnah zawng zawngte pawh a tithi vek thin chu environment pumpui tan a hlawuhawm thei a ni, a ti bawk. Horticulture Department leh Central YMA hmalak dun tur chungchangah Minister chuan lawmthu sawiin ramin a sawtpui ngei a beisei thu leh khaw hrang hranga YMA Branch ten theihtawpin sorkar hmalakna thlawp zel turin a chah a ni.

Horticulture Director Dr.Elizabeth Saipari pawhin thu sawiin thlai damdawi hman dik loh / thiam tawk loh avangin rannung puang te pawh a takin kan ramah a thleng zel a, a hmaa buaipui tham loh kha tunah chuan buaipui tham a ni tawh, a ti. Greenhouse chhunga damdawi kah phei chu fimkhur a ngai zual thu leh thlai venhimna damdawite hi a nihna ang chauha hman chuan thil hlauhawm a ni lo tih thu sawiin Dr.Saipari chuan fimkhur leh uluk taka a nihna ang taka hman chuan thlai a hrisel leh tha duh em em a, kan thawhrah hlawk zawka kan seng theih nan leh ei leh bar kawnga kan intodelh theih nana min puitu tangkai tak a ni thung, a ti.

Central YMA President Pu Vanlalruata pawhin thu sawiin YMA Conference hnuhnung berah khan thlai damdawi hmandanah fimkhur a tulzia an inhrilh a; Horticulture Department pawhin chu chu ngai pawimawhin hmanhmawh takin he lehkhabu tangkai tak tur a buatsaih thei chu lawmawm hle a ni, a ti. Central YMA chuan naktuk ni 12.9.2018-ah Central Coordination Committee koin Mizoram hmun hrang hrangah YMA Branch-ten an lo sem theih turin he lehkhabu hi pek vek an ni dawn tih a sawi. Mizo pa hriatthiam theih tur ngeia Mizo tawnga lehkhabu buatsaih leh Saptawng a tlem theih ang ber hman a nih chu a lawmawm takzet a ni, a ti bawk.

Vawiina Horticulture Minister-in a tlangzarh Pesticides Booklet hian thlai venhimna damdawi chi hrang hrangte hman fimkhur a tulzia te leh hman dik loh avanga pawi thlen theite tarlan a ni a. Hman fimkhur a tulzia leh fimkhur dan tur chi hrang hrangte tarlan a ni a, hetianga damdawi fimkhur zawk leh a hman dan tur dik taka CYMA kaltlanga mipuite hnena zirtir a nih chuan tangkai zawk leh sawt zawkin mipuiten an lo dawnsawn beisei a ni. Lehkhabu tlangzarhna inkhawm tawi hi Horticulture Jt. Director Pu K.Lalduhawma’n lawmthu sawina neiin hun a khar a ni.