No.1716/2021-2022

Champhai, the 6th August, 2021: Champhai District-ah inbiakpawhna Mobile Services Network changtlung leh tha zawk a awm theih dan tur chungchang ngaihtuahin vawiin khan Addl. DC Pu Henry C.Lalrawnkima kaihhruaiin DC Conference Hall-ah meeting neih a ni.

Meeting kaihruaitu Pu Henry C.Lalrawnkima chuan nitin khawsak leh nunphungah mobile services network-in hmun pawimawh tak a chan thu sawiin, rikrum leh chhiattawh thilte bakah law and order kenkawh kawnga inbiakpawh zung zung a tul changin a pawimawh lehzual a, hemi a nih avang hian mobile services network tha leh changtlung zawk neih a tul hle a ni, a ti a. Inbiakpawhna hrang hranga thawktute chu an harsatna tawhte thuneitute hnena thlen hrehlo tura chahin, DC Office chuan theihtawp chhuahpui a inhuam thu a hrilh a. Hun harsaah pawh sawrkarin mobile services provider-te a ngaipawimawha theihtawp a chhuahpui thin ang bawkin mipuite tana hmasawn tuma theihtawp chhuah theuh turin a chah a ni.

He hunah hian mobile services provider hrang hrang hotute hnen atangin Champhai District-a inbiakpawhna tihhmasawn a nih theihna kawnga an hmalakna, harsatna tawh leh hmachhawp hrang hrangte ngaihthlak a ni a. Line chiang lo leh signal loss awm thei hrang hrangte bakah electric current rei tak awm loh changa khawl tinung reng thei tur hmanraw changtlung zawk neih dan tur chungchang leh hmasawn tuma ngaihtuahna sen mek a nih thute ngaihthlak a ni a. Theihtawp an chhuah mek zel thu leh ruahmanna an duante tha taka a kal tluang chuan mobile services network changtlung zawk a awm thuai an beisei thu an tarlang bawk.

Thutkhawmah hian services provider-ten anmahni dawrtu mipuite harsatna sutkiang kawnga chak lehzuala hma an lak theihna turin Customer service tha taka an kalpui theihna turin ruahmnna siam ni se, mipui ten an biakpawh zung zung theihna tur phone number mipuiah zau zawka hrilhhriat ni se tih a ni a. Mobile network chian loh leh harsatna tawh changa inhrilhhriat zung zungna tur leh mipuite hrilhfiah theihna tur Situation Report Centre din tha tih niin, service provider-te chu harsatna an neih leh bawhzui ngai angte DC Office-ah August ni 13, 2021 hmaa thehluh vek tura tih an ni a. Mobile services network line tihchhiat a nih lohna tur leh dimdawi taka enkawl a nih theihna turin mipuite hnenah ngenna leh inzirtirna lam hawi hriattirna tihchhuah ni se tih a ni bawk a. Service provider-te chu an hnathawh kawng hrang hrangin mipuiah hartsatna a thlen loh nana felfai taka hma la tur leh ram chinchangte hriaa zir hmasa zel tura tih an ni a. Champhai khawpui chhunga wire thlun hnawk senghawi chungchanga Bawrhsap thuchhuah bawhzui a nih dante pawh sawiho niin, khawlaia wire tangkailote senghawi a nih thute ngaihthlak niin, a tul ang zela enzui ni se tih a ni bawk.

Vawiin meeting-ah hian Addl. DC Pu Henry C.Lalrawnkima, Addl. SP Pu C.Lalengliana, Official dangte, Sub-Hqrs. YMA leh MJA President-te bakah Mobile Services Provider hrang hrang hotute an tel a ni.