Vawiin khan Champhai District Disaster Management Committee bultumin CHANEM Building, l.B. Veng, Champhai ah leh Circuit House, Bethel Veng, Champhaiah te lirnghingin chhiatna a thlen thulha chhawmdawlna hna thawh dan tur enchhinna, Mock Drill neih a ni.

CHANEM Building-ah chawhma dar 11:00 ah lirnghing entir nan Siren tih rik niin CHANEM Building-a awm, office paruk leh zirna in pathumte bakah dawr luahtute chu lirnghing na tak thlen thulh atana ruahmanna an siamte entirin hmun him panin an tlankhawm ghal a. Chhanchhuahna hna thawk tura ruat (Rescue Team), Govt. G.M. Higher Secondary School Naupangten hliam tuar leh mahnia insaseng theilote chhanchhuah dan thiam takin an entir a. Fire & Emergency Services-te pawhin an hmanraw neihte nen thawk chhuak in kangmei chu a hun takah an thelh mit thei bawk. Champhai District Hospital Doctor-te leh Nurse-te pawh Ambulance nen thawk chhuakin hliam tuar leh nunna chante bawihsawm dan a takin an entir bawk.

Circuit House-ah hian lirnghing entir nan chawhnu dar 1:00 ah siren tih rik a ni a. He hunah pawh hian mawhphurtu hrang hrangten an mawhphurhna hneh takin an entir a. Chhiatrupna lo thlen thulha hmalak dan tura ruahmanna siamsa chu a taka entirin a hun takah harsatnate an chingfel thei a ni.

CHANEM Building-a office awm zawng zawngte hian Disaster Mangagement Plan intawm siam niin vawiin Mock Drill-ah khan he Plan hi ataka enchhin a ni a, a hlawhtling thawkhat hle a ni. CHANEM Building-ah hian sawrkar office panga - DCSO, DUDO, DIPR, Treasury leh DSYO te an awm mek a. Heng bakah hian Mimal leh tlawmngaipawl office bakah zirna in leh dawr engemawzat a awm a ni.

Vawiina Mock Drill hi Champhai District Bawrhsap Pu Vanlalngaihsaka, IAS bakah Addl. DC Pu C. Lalzarliana, SDO (S) Pu Pachhunga, ASO/Nodal Officer DM&R Pu Victor Lalawmpuia, DDMC Pu P.C. Zoramthara leh Champhai khawpui chhunga Head of Office hrang hrangte an hmanpui a ni.