Vawiin khan Champhai Forest Division buatsaihin Mother Teresa pianchamphaphak 108-na hriatrengnan DFO Office ramchhung, Bethel Veng, Champhaiah thingphun hnatlang neih a ni a. He hun hi Champhai North bialtu MLA Pu TT Zothansanga chuan a hmanpui a, he ni pual hian thing a phun a ni.

Pu TT Zothansanga chuan Mother Teresa chu hmangaihnaa khat, thliar bik awmloa a mihringpuite rawngbawlsaktu leh a nun puma mite tanpui thintu anih thu a sawi a. Mother Teresa chu khawvel miropui berte zinga mi, chawimawina hrang hrang pawh lo dawng tawh leh India rama sakhaw dang betute pawhin an ngaihsan rawn a ni, a ti a. A thil tih avangin Roman Catholic pawhin mi thianghlimah a puanga, khawvel awm chhungin a hming a dai ngai tawh dawn loh thu a sawi a. Forest and Climate Change Department bengvarnaa a mah hriatrengnana Forest Division hrang hranga  thingphun hnatlang  buatsaih a ni chu lawmawm a tih thu a sawi bawk a ni.

He hunah hian Pu C. Lalhnunpuia, Honorary Wildlife Warden; Pu C.Lalbiaka IFS, DFO Champhai Forest Division; Dr. Lallawmkima, DIPRO Champhai leh midangte’n he ni pual hian thing tiak an phun a. Champhai Forest Division Office, Champhaia  thawkten Office leh a chhehvel tifaiin hnatlang an nei chhunzawm nghal a ni.

Mother Teresa hi Kum 1910, August Ni 26 khan Skopje, Macedonia-ah a pianga, kumin August Ni 26 hi Pathianni anih avangin vawiin lamah a pianchamphaphak 108-na pualin thingphun hnatlang hi buatsaih a ni.