Vawiin chawhma khan Information & Public Relations Department Auditorium ah Sanitation Campaign 2018 atan a hmalak dan tur hrang hrang inhrilhhriatna hun leh kalpui dan tur training neih a ni a, Aizawl Bawrhsap Dr A.Muthamma, IAS , District Sanitation Implementation Committee Chairman ni bawk chu Khuallian a ni a, Pu John LT Sanga Addl. DC in he hun hi a kaihruai.

Aizawl Bawrhsap Dr A.Muthamma chuan Mizote hi faina ngaina tak hnam in ni a, kan khawpui te hi fai taka kan enkawl zel theih nan bawlhhlawh sawngbawl dan mumal tak kan neih a ngai a ni, a ti a, He  Sanitation Campaign ah hian kan veng chhung theuh kan tihfai bakah kan veng chhungah faina kawnga hma kan sawn theuh theihna turin tan ila ang u, a ti. Dr A Muthamma chuan Aizawl luhka ber, Lengpui atanga Hunthar veng thleng hi zin mite hmuh hmasak a nih avangin faina kawngah ngaihpawimawh hmasak a tul a ni, a ti bawk.

Pu John LT Sanga Addl DC chuan Mizoram hi kan ram neihchhun a ni a, mawi tak leh fai taka enkawl tura kan mawhphurna hlenchhuak tur hian tan kan lak angai a, hemi tur hian he Sanitation Campaign 2018 hi I hmang tangkai ang u, a ti.

Pu Alan Lalthanzara, MCS, Asst Commissioner Aizawl chuan Power point presentation hmangin Sanitation Campaign 2018 kalpui dan tur tlangpui inhrilhhriatna hun a hmang a, Pu Ralthuama Ralte AMC Town Planner hnen atangin thusawi ngaihthlak a ni bawk. Training zawhah hian Local Council hruaitute leh Aizawl DC hotute chuan veng tih hmasawnna kawnga harsatna an neih hrang hrang sawihona hun an hmang bawk.

Mizoram sawrkar flagship programme NEDP hnuaiah UD&PA department kaltlangin Aizawl DC in Sanitation Campaign 2018 hi  buatsaih a tum a. Sanitation campaign chhung hian kan tui hna, luikawr leh luikam tih fai uar zawk a kalpui tum ani a, Aizawl khawpui chhung a Local Council hruaitute nen thawk hovin Tlawng leh Chite lui fintu luikawr tam zawk luanna Vengah te Sanitation campaign hi nasa zawk a kalpui tum a ni. Sanitation Campaign 2018 ah hian Local Council 26 te bakah Lengpui, Darlawn, Saitual leh Sairang ah te faina kawnga hmalakna kalpui tura ruahmanna siam a ni.