March ni 8 & 9, 2018-a Lawngtlai District chhunga Sentetfiang khuaa a tum khat nana buatsaih Chokhlei Kut (Rhododendron Festival) 2018 hman dan chu vawiin khan Lawngtlai Bawrhsap Pu N. Chakhai MCS hovin Lawngtlai DC Conference Hall-ah thlir let a ni.

He hunah hian LADC-a Agriculture changtu Executive Member Pu C. Sangchhunga bakah, state leh LADC official te, CYLA leh tlawmngai pawl dang ai awhte an kal khawm a. Chokhlei Kut hmanna tur sum lut leh senso tar lanna (statement) chu thlir ho niin, member-te'n hriat chian loh lai an neihte zawhna leh sawi fiahna hun hman a ni a. Hemi hnu hian Chokhlei Kut buatsaih dan leh a kut chungchang sawi ho chhunzawm niin, member-te chuan hlawhtling thawkhata an hriat thu leh kum dangah pawh tih zel tlaka an ngaih thu an sawi hlawm a. Pui leh felfai zawka buatsaih a nih theih nan, DC Chairman-na hnuaia organising committee-in buatsaih tawh lovin, LADC chu a bul tumtu leh buaipuitu ber ni tawh zawk se, tih a ni a. Chuti ang tur chuan LADC hotute hnenah thu thlen a, hma la tura ngen ni se, tih a ni.

Chokhlei Kut hi chhawkhlei par chawi vul a, humhalh leh ngaihhlut deuh deuh a lo nih theih nan leh ram pawn atanga zin mite hip luhna tur atana ruahman niin, chhawkhlei par vul lai tak, March ni 8 & 9, 2018 khan Phawngpui tlang bulthuta Sentetfiang khuaah a tum khat nan hlawhtling taka buatsaih a ni a. He Kut buatsaih nan hian LADC leh state sawrkar department hrang hrangin Rs 3,49,000/- an thawh khawm a. NEC atangin Rs nuai 4 dil niin, 1st installment-ah Rs nuai 3 hmuh a ni tawh a, Rs nuai 1 dang la beisei mek a ni bawk. He Kut senso atan hian tun thlengin Rs 5,93,400/- hman tawh a ni.