Mizoram ah a vawikhatna a tan Cancer veite khawtlang huapa chhawmdawlna leh enkawlna mumal zawk a awm theihnan Kolasib District a Cancer veite tan Inrinni khan Thupui ah ‘Beiseina Eng’ tih hmangin ‘Kolasib District Cancer Support Group’ din a ni.

 He Support group din dan tur ngaituahna thutkhawm hi kolasib Bawrhsap Dr.Arun T,IAS in a kaihruai a, Dr.Ravi Kannan, Cachar Cancer Hospital a Oncologist leh Director ni bawk chuan Cancer natna hi India ram pum a bikin Mizoramah a hluar hle a, chhungkaw tamtak a tibuai mek a cancer natna tuar mek ten inekawlna chungchangah pawh kawng hrang hrangin harsatna tamtak an tawm mek a, Cancer Support Group member te hian heng inenkawl mekte hi nasa takin an tanpui thei dawn ani a ti a, Dr.Ravi Kannan chuan Cancer natna hi zuk leh hmuam tih nasat, zu in nasat, ei leh ina fimkhur loh vang te bakah nunphung hrisel zawm loh vang (taksa insawi zawi peihloh) te a awm thei a nih thu a sawi a.

Dr.Viji Venkatesh, Maxx Foundation India chuan Cancer support group din a tulna chhan leh a pawimawh na te, Cancer natna vei mek ten  hreawm tak leh rilru hah taka an hun an hman loh theih dan tur te power point presentation hmangin zirtirna a pe a, Mizo te chu inpawh taka khawsa ho an ni tih a hriat avangin khawtlang huapa cancer natna veite chhawmdawl dan tur ngaituah chu thil harsa tak a nih a rinloh thu a sawi bawk a ni.

Kolasib District Cancer support group ah hian Core Committee siam niin Bawrhsap Dr.Arun T chu Patron a ni a, Pi Vanlalchhuangi President Sub-Hqrs MHIP chu convener atan ruat a ni a, Member a tan Pu C.Lianzuala President Sub-Hqrs MUP, Pu C.Liankunga President Sub-Hqrs YMA, Dr.James RE Mawia, District medical Superintendent leh Pu Sangchungnunga Mizoram Cancer care foundation (kolasib) te ruat an ni a, Kolasib District Cancer support Group Member tur hian NGO hrang hrang atang bakah Cancer natna vei mek chhungte atangin volunteer engemawzat an inpe a ni.