Vawiin chawhma khan Aijal Club-ah Rural Development Minister Pu R. Lalzirliana’n kar khat awh tur ‘Participatory Ground Water Management & Springshed Development Training’ a hawng a. Rural Development Department Commissioner & Secretary Pu Lalhmingthanga, IAS chu khualzahawm a ni. Rural Development Department hnuaia Mizoram Watershed Development Agency (MzWDA) leh People's Science Institute (PSI) Dehradun tangkawp buatsaih a ni a. Training hi National Bank for Agriculture and Rural Development (NABARD) bultum a ni.

Khuallian Pu R. Lalzirliana chuan tuihna humhalhna leh tui luangral tur tangkai taka hman a nih theih nana training  buatsaih a ni chu lawmawm a tih thu a sawi a. Sawrkar chuan leilung leh tui humhalhna kawngah project hrang hrang hmangin hmalakna tam tak a nei tawh a ni tiin Rural Development Department chuan Pradhan Mantri Krishi Sinchayee Yojana- Watershed Development Component (PMKSY-WDC) kum 2009 atang khan a kalpui a, training pawh hian hemi kalpuinaah hlawkna tam tak a thlen ngei a beiseiawm a ni, a ti a. Kan ramah hian ruahtui a tam em em a, chutiang karah chuan kan kham khawp tui kan hmu lo thin hi a pawi hle a ni, a ti a. Tui humhalhna tur kawng hrang hrang training-a zir turte chu thahnemngai taka ngaithla a, kengkawh zui turin kalkhawmte chu a fuih a. Thingtlang lam hnathawkte hrilh leh chhawng theitu in nih ngei a ngai a ni, a ti a. NABARD leh People's Science Institute (PSI) chungah lawmthu a sawi bawk a ni.   

Khualzahawm Pu Lalhmingthanga, IAS chuan thu sawiin kum thum kalta khan Nagaland sawrkar leh People's Science Institute (PSI) tangkawp buatsaih Consultative Meeting and Training on Participatory Ground Water Management, Nagaland-a neihah kan han tel ve a, kha training khan Mizorama kan buaina lian tak tui luangral turte donaah min pui nasa a ni, a ti a. Mizoram ngeia PSI ten training min pe thei tur hi a lawmawm hle a ni tiin an thiamnate kan hlawkpui ngei a rinawm a ni, a ti.  

People's Science Institute (PSI) Dehradun hi kum 1988-a din niin Non-Governmental Organization a ni a. Himalayan states leh North East-ah sawrkar nen tangkawpin Natural Resource Management an kalpui a. Tui humhalh bakah tui thianghlimna vawn that thlengin hma an la a. Heng bakah hian ramngaw humhalh leh chhiatrupna thlen huna inven dan tur chungchangah project hrang hrang an kalpui bawk a ni. NABARD hian thingtlang lama hmasawnna ruhrel din turin tan an la mek zel a. Sawrkar Department hrang hrang nen an thawkho thin a. Rural Development Department leh NABARD hian Rural Infrastructure Development Fund (RIDF) hnuaiah ‘Springshed Development Programme’ an kalpui dawn bawk a ni.

Training hawnna hun hi Mizoram Watershed Development Agency (MzWDA) CEO leh Rural Development Department Director Pu Lalhriatpuia chuan kaihruaiin kalkhawmte lawmna thu a sawi a. NABARD General Manager Pu RK Srivastava chuan thusawina hun a nei a. PSI mithiamte atangin thusawi ngaihthlak a ni a. MzWDA Joint CEO Pi Rita Lalnunmawii Pachuau chuan lawmthu sawina in hun a khar a. People's Science Institute (PSI) atang hian mi thiam tak tak pathum-Pu Rajesh Kumar, Pu Vargish Bamola leh Pu Tanmay Pisolkar ten zirtirna an pe dawn a ni. Rural Development Department hnathawkte leh Mizoram Watershed Development Agency (MzWDA) hnathawkte an tel a ni.

 

Attachment

  • Loading attachment...