Vawiin khan BNRGSK Hall Lawngtlaiah Lawngtlai RD Block huam chhunga awmte tana Mizoram Right to Public Services Act, 2015 chungchang zir hona (awareness training) buatsaih a ni. 

He hunah hian Lawngtlai RD Block chhunga sawrkar department hrang hranga thawktute, VCP te leh tlawmngai pawl hruaitute an tel a. Training-a telte chu Lawngtlai Sub-DC Pi Christina Lalmuanzuali MCS chuan he dan chungchanga hriat tur pawimawhte a zirtir a. He dan hi sawrkarin mipuite hnena service a pek chhuahte hunbi tiam chhunga pek chhuah zat zat a nih theih nan leh tihkhawtlai a awm loh nana siam a nih thu a sawi.

He danah hian mipuite chanvo leh mawhphurhna te, sawrkar hna thawkte mawhphurhna te leh lungawi lohna thlen dan leh hremna te a chuang a. He dan hnuaiah hian service seng luh tawh 46 awm mekin, a dang pawh la seng luh belh zel tum a ni a. Service seng luh tawh zingah hian Transport Department hnuaia "driving licence pek" te, PHED hnuaia "mimal hnena tui supply connection pek" te, Taxation Department chanah "Mizoram Societies Registration Act, 2005 hnuai registration certificate pek chhuah" te, RD Department chanah "MGNREGA hnuaia job card siamsak" te pawh a tel a. He'ng service-te hi hunbi tiam chhunga pek a nih loh chuan Mizoram Right to Public Services Act, 2015 hnuaiah hian a mawhphurtute chu hrem theih an ni.

Mizoram Right to Public Services Act, 2015 hi December ni 1, 2015 atanga hman tan kha niin, tunah hian awareness training hi Mizoram chhunga RD block tinah kalpui mek a ni a. Lawngtlai District-ah pawh hian Sangau leh Lawngtlai block-ah te neih tawh niin, Chawngte leh Bungtlang S block-ah te la neih leh tur a ni.