2651/2022-2023
Champhai, the 14th November, 2022: District Child Protection Unit (DCPU), Champhai buatsaihin vawiin khan Chhangphut Field, Champhaiah Naupangte Ni, National Children's Day 2022 lawmna hun hman a ni. He hun hi District Bawrhsap Pu James Lalrinchhana chuan khuallian niin a hmanpui a, Superintendent of Police Pu Lalrinpuia Varte chu khualzahawm a ni.

Khuallian Pu James Lalrinchhana chuan naupangte ni bik puala programme changtlung tak Champhaia buatsaih a ni chu lawmawm tiin, Children's Day chu naupangte ngainatu leh naupangte ngainat hlawh tak India Prime Minister hmasa ber Pandit Jawaharlal Nehru piancham hriatreng nana hman thin a ni, a ti a. He ni pual hian zirna in leh naupang enkawlna hmun hrang hrangahte hun hman thin anih thu tarlangin, Children's Day lawmna chuan naupangteah inthianthatna leh inkawmngeihna a thlen ngei a beisei thu a sawi bawk.

Khuallian chuan sawi chhunzawmin, Children's Day lawman hun hman chuan nakin lawka ram hruaitu leh khua leh tui tha ni mai tur naupangte kum tluana ngaihsak leh enkawl zui zel kawngah tanlakna thar thlen se a duh thu sawiin, heng mai bakah hian naupangte dikna leh chanvo, himna thlenga thawktute tan pawha inenfiahna leh intuaitharna thlen ngei se a duh thu a sawi bawk a. Naupangte'n nun hlim tak an hmana puitling tha taka chherchhuah an nih theih nan kan zavaia tanrual a ngai a ni, a ti bawk a. Naupangte chu an ni puala hun hlimawm leh thlamuang tak hmang turin duhsakna a hlan a ni.

Khualzahawm Champhai SP Pu Lalrinpuia Varte chuan hnam rohlu naupangte chu ruihhlo leh a kaihhnawih laka fihlim tur leh tih pawh ti chhin lo turin a fuih a. Internet leh social media hman chin tawk hre tur leh, invenna chang hriaa hemi kaltlanga bumna thangahte tal awk lo tura fimkhur theuh turin a chah a ni.

He hun hi Pu Lalthantluanga Tochhawng, Chairman, Child Welfare Committee (CWC) chuan kaihruaiin Pu Lalnunmawia, Member, Juvenile Justice Board (JJB) chuan kalkhawmte lawmna thu a sawi a. Pi R.Lalrinchhani, District Child Protection Officer (DCPO) in lawmthu sawiin hun a khar a ni.

Hemi hnu hian Children's Carnival hman a ni a. Naupangte pual intihhlimna hrang hrangte buatsaih niin, naupangte dikna leh chanvo inhrilhhriatna leh tarlannate hmuh theiha phochhuah a ni a. Ei leh in te sem niin, Children's Day puala hun hman hi naupangte'n an hlutin an kal tha hle a, hun hlimawm leh hlawkthlak tak hmanho a ni.