2650/2022-2023
Aizawl, the 14th November 2022 : Vawiin khan cheng nuai 487.45 senga sak Chaltlang Tourist Lodge Annex Building thar chu Tourism Minister Pu Robert Romawia Royte chuan a hawng. Tourist Lodge Annex Building thar hawnna inkhawm hi Tourism Department Director Pu Saitluanga’n a kaihruai a, Tourism Minister Pu Robert Romawia Royte chu khuallian niin Pu T.C Pachhunga, Vice Chairman, Tourism Development Board leh Pi Manisha Saxena IAS, Principal Secretary, Tourism Department te chu khual zahawm an ni.

He building thar hawnna inkhawmah hian Khuallian Pu Robert Romawia Royte chuan Mizoram Tourism Department-in hma a sawn nasatzia leh khualzinte tana thlenna tur nuam tak Tourist Lodge Annex building a hawng thei chu lawmawm a tih thu a sawi. Sorkar laipuiin ‘Responsible Tourism’ leh ‘Sustainable Tourism’ a kalpui mek behchhanin Mizoram pawhin ‘Mizoram Responsible Tourism Policy 2020’ a kalpui mek a, Tourism Department-a officer leh staff te inpekna leh thawhrimna zarah Tourism Department chu department chhuanawm tak a ni mek zel a ti. Minister chuan Tourism Department-a project hrang hrangte tarlangin infrastructure project-te hian Mizoram sorkarah sum tam tak GST leh Labour cess hmangin a chhunglut thin a, department hnathawh kallai piah lamah sum dehchhuahna tur kawng dangte hmuh thiam a pawimawh thu a sawi. Minister chuan Mizoram chhunga Tourist Lodge-te chu mipuiten thlen nan hmang fo se, mipui leh sorkar sum tuakna a ni tih hre rengin lodge hmang uar zual turin a duh thu a sawi bawk.

Khual zahawm Pu T.C. Pachhunga, Vice Chairman, Tourism Development Board leh Pi Manisha Saxena, IAS, Principal Secretary, Tourism Department te pawhin thu an sawi a; Er. Zothansangi, Sr. SDO, PWD-in Technical Report a pe bawk. Vawiin Chaltlang Tourist Lodge Annex Building thar hawnna inkhawmah hian Pu H. Biakzauva, Vice-Chairman, Agriculture Development Board, Er. H. Lalzirliana, Vice Chairman, Road & Infrastructure Development Board, Pu K. Pachhunga, Vice-Chairman, Bamboo Development Board te bakah Tourism Development Board member-te, Chaltlang Local Council Chairman leh member-te leh Tourism department officer leh staff an tel a ni.

Annex building sakna hi Destination Development Scheme in the State of Mizoram, Ministry of Tourism (NE Section) hnuaia hmuh a ni a. He building hi teh kualin metre 2462.28 bial a thut a, chhawng 4 (Basement-2, Basement-1, Ground Floor leh 1st Floor) a sang a ni. Basement-2 ah Type-1 Quarter 6 a awm a, Basement-1 ah Conference room mi 280 leng, Board room mi 75 leng, Store room leh Lounge te a awm a. Ground Floor-ah VIP Suite 2 leh Room 8 awmin, 1st Floor ah VIP Suite 2, Room 8 leh Store room 2 a awm bawk. Ministry of Tourism atanga sum hmuh bakah hian Tourism Department-in room floor-tiles te, conference room-a floor tile te leh furniture leh furnishing te a tum vek bawk a ni.

Hun kharnaa lawmthu sawitu Tourism Department, Joint Secretary Pu V. Lalengmawia chuan tun thla November ni 16-19, 2022 chhunga International Tourism Mart neih turah mipui zawng zawngte tel theuh turin a sawm a ni.