2652/2022-2023
Sahmulphah thla ni 14, 2022: Vawiin kha ‘Naupangte Ni’ (Children’s Day) a ni a. Lawngtlai District Child Protection Unit (DCPU) chuan he ni lawmna hi Lawngtlai-III-a Central YLA Hall-ah an buatsaih.
He hunah hian Lai Autonomous District Council (LADC)-a Executive Secretary Pu H. Lalruatkima chu Khuallian a ni a. Naupangte pawimawhzia sawiin, Sawrkarin naupangte humhalhna leh hamṭhatna atana ruahmanna hrang hrang a neihte a tar lang a. Zirlai kal khawmte fuihna thu sawiin, nu leh pa thu awih tur te, a ṭha zawng chauhva social media hmang tur te, ruihtheihthil leh mipat hmeichhiat hman khawlohna laka inthiar fihlim tur te, tum fel tak neia lehkha zir tur leh Pathian hriatna nunpui tur tein a fuih a ni.
Lawngtlai DCPU huaihawta Naupangte Ni hmanah hian Baptist Church of Mizoram (BCM) Lawngtlai Area-a Executive Secretary Rev. Dr H. Lalthlamuana chuan hunserh hmangin, Lawngtlai District Child Protection Officer Pi Mary Lalremruati chuan kal khawmte lawmna thu leh hun hman chhan tlangpui a sawi a. Lawngtlai District Information & Public Relations Officer Pu C. Lalhruaitluanga'n naupangte fuih phurna thu (motivational speech) sawiin, Lawngtlai DCPU Counsellor Pi N. Darchhingpuii chuan naupangte himna tur leh fimkhurna tur (child safety measures & precautions) a lem nen entirin a zirtir bawk.
Vawiina Naupangte Ni hmannaah hian Lawngtlai khawpui chhunga sikul hrang hrang zirlaite leh zirtirtute an fuan khawm a. He hun hi naupang pual a nih angin naupangte’n hlim taka hun an hman theih nan leh an thiam thilte an pho lan theihna tur hun remchang atana ruahman a ni.
He hunah hian Sparkle Kids Pre-School naupangte'n lam entirin, N. Lalkhawngaihsangi (Govt Model English School) hnen aṭangin malzai leh Harvard English School aṭangin duet zai ngaihthlak a ni a. Govt Model English School te’n hnam lam entirin, Harvard English School te'n Bru hnam lam an entir a, ML Junior English School leh Chandmary Comprehensive English School te'n lam an entir bawk a. Jehova Jire Higher Secondary School te'n social media-in nghawng a neihte tar lanna lemchan tawi an entir bawk.
Naupangte Ni hmannaah hian Lawngtlai aṭanga Mizoram pum huapa zaithiam lar, Vanlalzawmpuii Hrahsel leh Late-i Hringngen te pawh an zai bakah, Mizoram's Got Talent 2021-a semi finalist Robert Lianmalsawma chu Aizawl aṭanga chah chhuah niin, mitdawivaih hmuhnawm leh hlimawm tak a entir a. DCPU-a Legal-cum-Probation Officer Pu K. Lalliantluanga chuan lawm thu sawiin hun a khar a ni.
Naupangte Ni hi India ram Prime Minister hmasa ber leh naupangte ngai pawimawhtu Pandit Jawaharlal Nehru pian champha phakah hman ṭhin a ni a. He ni pual hian zirna in leh hmun dangah te naupangte tan intihhlimna buatsaih ṭhin a ni.
Attachment
- Loading attachment...
