3290/2022-2023
Champhai, the 18th January, 2023: District Programme Office, Women and Child Development Department buatsaihin vawiin chawhma dar 11 khan January ni 24, 2023 a lo thleng tur National Girl Child Day, 2023 lawmna puala hmalakna tur hrang hrangte bultanna hun DC Conference Hall-ah Champhai District Bawrhsap, Pu James Lalrinchhana hova hman a ni.

District Bawrhsap Pu James Lalrinchhana chuan National Girl Child Day lawmna puala hmeichhe naupangte dikna leh chanvo humhimna tura hmalakna tur hrang hrangte hawnna hun buatsaih a ni chu lawmawm a tih thu a sawi a. India ram pum anga thlirin hmeichhe naupiang an tlem zawk thu leh hmeichhe fa enhranna a awm thin avangtea hetiang lam hawia thil chin thalote nuaibo anih theih nan Sawrkarin theihtawp a chhuah a ni, a ti a. Khawtlang, District, State leh rampum huapin hmeichhiate dinhmun chawikan kawngah zirchianna leh hmalakna kan kalpui a tul a, zirna in leh thil tihna hmun dangte thlenga an dinhmun enfiah a pawimawh thu a sawi a. Hmeichhiate enhrang bik mai lova humhim leh dawmkan kawnga tanlak a pawimawh thu sawiin, zirna, hriselna, ei leh in leh infiamnaahte duata dawmkan an ngai a ni, a ti bawk.

Hmeichhe naupangte chawikan nana Sawrkar laipui duan Scheme pawimawh tak Beti Bachao Beti Padhao hnuaia hmalakna hrangte tarlangin, nakin lawka chhungkua, khawtlang leh ram tana chhawrnahawm tur nu tha chherchhuah kawnga tan la turin line department hrang hranga thawktute a sawm a. National Girl Child Day lawmna puala programme duan hrang hrangte chu sawifiahin, program changtlung leh hlawkthlak tak tur duan a ni chu tha a tih thu a sawi a, tangkai taka hman anih beiseiin National Girl Child Day lawmna tura program duan hrang hrangte tha taka hlenchhuah anih theih nan duhsakna a hlan a ni.

He hun hi Pu Lalrinmuana, District Programme Officer, Women and Child Development, Social Welfare & Tribal Affairs Department chuan kaihruaiin Pi K.Lalrinfimi, District Mission Coordinator, District Hub for Empowerment of Women (DHEW) hnen atangin National Girl Child Day lawm anih chhante ngaihthlak a ni a. Pi Esther Leihang, SDC kaihhruaiin National Girl Child Day pual thutiam lak a ni a. Pu Rodingliana, Specialist in Financial Literacy, DHEW-in lawmthu sawiin hun hman a khar a ni.

Sawrkar laipui Ministry of Women and Child Development kaltlangin kum 2008 atang khan National Girl Child Day lawmna hun buatsaih thin a ni a. January ni 22, 2015 a Sawrkar laipuiin a kalpui tan, 'Beti Bachao Beti Padhao (BBBP) - Save the girl child; Educate the girl child - Hmeichhe naupang chhanhim la, Lehkha zirtir rawh' tih Scheme hnuaiah National Girl Child Day lawmna hi nasa lehzuala kalpui a ni a. Hemi hnuaia program hrang hrangte kaltlangin hmeichhe naupangte dikna leh chanvo humhim, child sex ratio tihhniam, an dinhmun chawikan, inthliarna nuaibo leh zirtirna tha pek hmangin an tana khawvel tukverh thar hawn sak tuma hmalak a ni a. Khawvel inherdanglam ang zelin thupui thlan bik neiin National Girl Child Day hi lawm thin a ni.

Ruahman dan chuan District Programme Office, Women and Child Development Department bultumin National Girl Child Day, 2023 lawmna pual hian naktuk January ni 19, 2023 hian Beti Bachao Beti Padhao (BBBP) sticker-te vantlang hmunhma langsar laiahte tarchhuah a ni dawn a. January ni 20 hian Middle School leh High Sçhool-ahte lem inziahsiak huaihawt tum a ni a, January ni 23 hian NGO te hnenah BBBP chunchang inhrilhhriatna hun hman anih dawn bakah, January ni 24 hian local girl champion chawimawina, plantation drive, baby muslin cloth, certificate leh cash incentive Rs 2,000/- semchhuahna hun hman tum a ni.