3342/2022-2023

Champhai, the 23rd January, 2023: District Hub for Empowerment of Women (DHEW), District Programme Office, Champhai District buatsaihin vawiin chawhnu dar 1 khan District Hospital Champhai OPD kawtah National Girl Child Day, 2023 lawmna leh hemi puala program hrang hrang kalpuite kharna hun hman a ni.

Pu Lalrinmuana, District Programme Officer (DPO), Women and Child Development, Social Welfare & Tribal Affairs Department chuan National Girl Child Day puala hmalakna chi hrang hrangte hlawhtlinna mipui kutah tam tak a awm thu a sawi a. Hmeichhe naupangte dinhmun chawikan kawnga theihtawp chhuah pui turin mipuite a sawm nghal bawk.

Dr. Zatluanga, DMS Champhai pawhin he hunah hian thu sawiin, Women & Child Development hmalakna chi hrang hrangte fakawm a ti a. National Girl Child Day lawmna puala hmalaknate chu medical lam hmalakna nen a inzul thu sawiin, District Hospital Champhai chuan an hmalaknate theihtawp chhuah pui a inhuam thu a tarlang a. District Hospital ho zingah Champhai chu Aizawl tih lohah chuan nau piang tam berna anih thu a sawi bawk.

Hemi zawh hian Champhai District chhunga hmeichhe naupang chawimawi phu Badminton player pahnih, H.Lalchhanhimi D/o Jerry Khawtinkhuma, Venglai leh Zoramthari D/o Lalthlekchuailova (L) Vengthlangte chanchin tawi Pi Amy Lalthanzuali, Gender Specialist, DPO Office chuan chhiar chhuakin, lawmpuina momento leh pawisafai hlan an ni a. National Girl Child Day lawmna pual drawing competition buatsaiha pakhatna dinhmun hauhtu T. Vanlalremsangi, Class-IX, BC Lalthlamuana English Academy leh C. Labiaknungi, Class-IX, BC Lalthlamuana English Academy-te lawmpuina pawisafai pek an ni bawk.

Hun hman hi Pi H. Zodinsangi, UDC, DPO Office chuan a kaihruai a. Pi K. Lalrinfimi, District Mission Coordinator (DMC), District Hub for Empowerment of Women (DHEW), DPO Office hnen atangin National Girl Child Day hman chhunga hmalakna hrang hrangte ngaihthlak a ni a, lawmthu sawiin hun hman a khar a ni.

Hun hman zawh hnu hian hmeichhe naupiang lawmpuina neih chhunzawm a ni a. Dr. Zatluanga DMS, Pu Lalrinmuana DPO, Pu Lalruatmawia Ralte CDPO te chuan District Hospital Champhaia hmeichhe naupiangte lawmpui nan pawisafai leh naupuan an hlan a ni.

District Programme Office, Women and Child Development, Social Welfare & Tribal Affairs Department, Champhai bultumin January ni 18, 2023 atang khan National Girl Child Day, 2023 lawmna pual program hrang hrang kalpui a ni a; Beti Bachao Beti Padhao (BBBP) sticker-te vantlang hmunhma langsar laiahte tarchhuah a ni a. Zirlaite tan BBBP inzirtirna lam hawi lem inziahsiak huaihawt a ni a, NGO te hnenah BBBP chungchang hrilhhriatna hun neih anih bakah vawiin khan plantation drive neih a ni bawk.