3343/2022-2023

Aizawl, 24th January, 2023 : Home Minister Pu Lalchamliana chuan vawiin khan Secretariat Conference Hall, MINECO-ah online ILP portal thar “Revised Online Inner Line Permit (ILP) Portal Phase-I” a tlangzarh. He ILP portal Phase-I kaltlang hian online ilp.mizoram.gov.in/ in Temporary ILP, Temporary Stay Permit leh ILP Exemption Certificate dil theih a ni ang a, Home department official ten an pawm hnuah online hmanga fee pekin permit hi a download chhunzawm theih nghal dawn a ni.

ILP portal tlangzarhtu Home Minister Pu Lalchamliana chuan ILP kenkawh kawngah rahbi thar kan chuang kai a ni, a ti a. ILP chu hnam changkang zawk leh tam zawk ten min chimral loh nan British hovin kum 1873 khan min lo siamsak a, kumin hi ILP kan neih kum 150-na a lo ni reng tawh mai a, ILP hi kan inhumhimna atana pawimawh a, kum 1986 a India sawrkar leh MNF ten inremna thuthlung an ziahah pawh Mizoram sawrkar rawn lovin ILP hi hlih theih a ni lo tih a awm a, humhim turin kan tanrual zel a pawimawh a ni a ti.

Pu Lalchamliana chuan online ILP portal chuan kualzinte leh ILP mamawhte harsatna tawh thin tam tak a chhawk zangkhai ngei dawn a, DC office hrang hranga ILP khawihtute pawh a chhawk zangkhai ngei a rinawm a ni a ti a. ILP la lak ngai zingah tourist (khualzin) tan sponsor neih a ngai lova, hnathawk tur leh sumdawnna thila lo kalte tan sponsor neih a ngai a, hetih kawngah hian sponsortute mawhphurhna leh tih tur chungchangah inzirtirna kan inpek that a pawimawh a ni a ti bawk.

Online ILP portal hman a nih hma hi chuan ILP zawng zawng hi manual / offline a pek thin a ni a. Mizorama rawn lut tur te tan Mizoram House-ah emaw, check gate-ah emaw, Lengpui Airport-ah emaw, Temporary ILP lak a ngai thin. Heng Temporary ILP issuing authorities-ah te hian khualzin tan rei tak tak nghah a ngai thin a, harsatna an tawk thin a ni. Mizoram House atanga ILP diltu thenkhatte ILP dam hun chhungin Mizoramah an rawn luh hman loh chang a awm thin bawk.

Heng harsatnate hi sutkian a nih theih nan Home Department chuan ICT Department nen tangkawpin Online ILP Portal 16.12.2019 khan Home Minister-in, Arya Mess, PHQ-ah mipui hman theih turin a lo hawng tawh a ni.

Kum 2019 Online ILP portal kha hman a nih hnuah a tul anga tihchangtlun chhoh mek a nih laiin COVID-19 hripui khan Mizoram a nuai tak avangin, Covid darh zel tur ven nan kum 2020, March khan Thlawhna leh Lirthei hmanga international leh inter-State inkalpawhna zawng zawng chu ram chhungah khar vek a ni a. Online ILP portal pawh tihtawp lailawk a nih bakah ILP pekchhuah hrim hrim pawh tihtawp a ni a. COVID vanga inkhuahkhirhna hlih a nih hnu kum 2022 khan Online ILP portal hi tharthawh leh a ni a. Home Department leh ICT Department te tangkawpin 2019 Online ILP portal chu changtlung zawk turin a thar a siam that vek law law ni se tih a lo ni ta a ni.

He Revised Online ILP portal hi 2019 version nen a danglamna thenkhat chu:

1. 2019 portal-ah kha chuan Mizorama rawn lut turte'n Online-a ILP an dil hnuah Mizoram House-ah emaw, check gate-ah emaw, va buaipui leh a, pawisa an pek leh a ngai a. Revised Online ILP Portal-ah erawh Online vekin a tir atanga a tawp thlengin ILP diltuten awmhmun atangin an buaipui theih ta a. A awmzia chu Online payment hmangin ILP diltuin pawisa a pe ang a, online vekin ILP hi approve leh pekchhuah thin a ni tawh dawn a ni.

2. 2019 version-ah chuan ILP lem nge a tak enfiahna tur QR code dah a ni lova, tuna 2022 version-ah hi chuan Online-a ILP pek chhuah reng reng, a hard copy emaw, soft copy emaw pawh ni se QR code dah vek a ni dawn a. Heng QR code te hi Mobile online application hmangin a scan theih dawn a. Google Play Store leh Apple Store atanga a application download-in Police leh Tlawmngai pawl ten an Mobile hmangin an scan thei dawn a, QR code atang hian ILP tak leh a lem, a validity, a diltu details an hre vek thei dawn a ni. QR code hi a scan theih loh chuan a lem tihna a ni ang.

Revised Online ILP Portal hmanga application lo lut zawng zawng te chu Home Department in verification/checking an nei anga, verifying/checking authority ten an verify/check vek hnuah approving authority-te'n an approve leh ang. Application dik tawk lo chu checking authority te hian an lo reject zel anga, application felfaite chauh approve turin an process ang. Approving authority hi OSD-cum-Joint Secretary leh Superintendent, Home te an ni.

He Online Portal hmang thiam lo te chuan Mizoram House-ah emaw, entry point Vairengte-ah emaw, Lengpui Airport-ah emaw, online-a upload-sak turin puihna an dil thei anga, mobile signal awm miah lohna - Phaisen, Saiphaiah, etc.-ah te chuan manual-in an dilin / pekchhuah thei an la ni ang. A kimchang zawkin technical report-ah ngaihthlak a ni ang.

Revised Online ILP Portal hi tun Phase - I leh Phase — ll; a then tur a ni a. Phase - I atan Temporary ILP, Temporary Stay Permit leh ILP Exemption pek chhuahna atan kalpui phawt a ni ang a. Tihchangtlun zel turn niin Phase-ll ah chuan Regular ILP + renewal leh 2 years ILP + renewal te pawh huam tel turin ICT Department in hma an la mek bawk a ni.

Kum 2021, July khan ILP fee bik hi ennawn (revised) leh a ni a. ILP hi chi hrang hrang a awm a, a fee pawh bithliah hrang hrang siam a ni. Hetiangin -

1. Ni 7 dam Temporary ILP - Rs. 150/-

2. Ni 30 dam Temporary Stay Permit - Rs. 200/-

3. Thla 6 dam (Regular ILP) - Rs. 2,000/-

4. Kum 2 dam (2 years ILP) - Rs. 20,000/-

5. Application form hi 1 Rs. 150/- zel niin. Security deposit dahtir zel an ni a - Regular ILP (thla 6 dam)ah Rs. 2,000 niin, kum 2 damah Rs. 20,000/- dahkhamtir an ni bawk.