3344/2022-2023

Kolasib dated 24th January 2023: Vawiin chawhnu khan I&PR Conference Hall, Kolasibah Ministry of Micro, Small and Medium Enterprises, Govt. of India leh Department of Commerce & Industries țangkawpin 'Awareness Program on Intellectual Property Rights' an buatsaih a. Pu John LT Sanga, Deputy Commissioner chu khuallian niin Pi Ruchita Singh, Manager, CIPAM leh Pi Ginni Sabharwal, Deputy Manager ten zirtirna an pe a ni.

Pu John LT Sanga chuan nitin mihring nunphungah hna thawh dan nuam, awlsam leh sawt zawka awm theih nan thil thar ngaihtuah chhuah leh siamchhuah zel a ni a, heng thil siamchhuah thar te hi ngaihtuahna, hun leh tha senga siamchhuah a nih angin a hlawkna pawh a siam chhuaktu ngei ten an tel theih nan ‘Intellectual Property Rights’ a pawimawh thu a sawi a. Department of Commerce & Industries hnuaia hamthatna dawnga hma la mekte tan an chanvo humhalhsak a nih theih nan ‘Awareness Program on Intellectual Property Rights’ buatsaih a ni chu lawmawm a tih thu sawiin ‘Patent, Trademark, Copyright’ leh Intellectual Propery hnuaia rinluh theih thil hrang hrangte chu zirchiang a, an eizawnnaa harsatna an tawh loh nan ngaihpawimawh nachang hre hmasatu ni turin kalkhawmte a fuih.

Pu Diwakar, Assistant Director, MSME, DFO, Aizawl chuan eizawnna tihhmasawnna turin mipui indawrtawnna tha siam chu Sawrkarin a ngaihpawimawh thu sawiin insumdawntawnna leh thil thar siamchhuah kawnga hma latute tan DIC Campus, Kolasibah Flatted Factory sakna turin ruahmanna a awm thu a sawi. Pu P.C.Lalvuana, Joint Director, Commerce & Industries chuan kalkhawmte lawmna thu sawiin zawhna leh chhanna hun te hman a ni bawk.