Ram chhung hmun hrang hrangah Election Commission of India (ECI) din champha lawmna hun kum 2011 atanga kum tina hman thin National Voters’ Day (NVD) chu vawiin khan hman a ni a. Mizoram hmun dangte rualin National Voters’ Day vawi 9-na hi vawiin chawhma dar 11 khan DC Conference Hall Keifangtlangah hman a ni a. He hunah hian Champhai DC leh District Election Officer (DEO) nibawk Dr Naveen Agarwal chu khuallian a ni a. Kumin atana National Voters’ Day thupui thlan chu ‘No Voters Should be Left Behind’, ‘Vote neithei tumah hmaih an ni tur ani lo’,  tih a ni.

Khuallian Dr Naveen Aggarwal, IAS chuan Vote nei tharte duhsakna hlanin India ram chu khawvela mipui rorelna ram lian  ber niin, Universal Adult Franchise dan hmangin mi tupawh kum 18 tling chuan dan angin Vote thlak theihna chanvo a nei thei a ni, a ti a. Khawvel hmun thenkhatah Mipui ten an aiawh an thlan theih loh laiin India ramah chuan kan aiawh kan thlang thei a, hei hi kan vanneih bikna  a ni, a ti a. Mipui rorelna ramah chuan mipuiten an aiawh tura an  thlan sawrkarah an harsatna leh lungawilohna te an thlen a, chu chuan buaina lian tham chhuak tur a ven theih phah a ni, DEO chuan a ti a. National Voters’ Day pual hian India khua leh tui tinte chuan thinlung taka intiamkamna neiin, mahni chauh lo, midangte pawh  an dikna leh  chanvo hmang tangkaia vote thlak theuh tura inzirtir thar leh angaih thu a sawi a. Champhai District Election Officer, Dr Naveen Aggarwal chuan  Election kaihhnawiha zawhna, thu thlen duh  leh hriatfiah duh neite tana zawhfiah theihna tur, Toll Free Number 03831-1950 leh Voter Helpline App & PWD App siam chu a tlangzarh nghal a ni.

 He hun hi Pu Abraham Beirazi Khithie, Election Officer Champhai chuan a kaihruai a. Pi  Laldinfeli, SDC Champhaiin National Voters Day (NVD) puala Chief Election Commissioner (CEC) thuchah a chhiarchhuak a. Pi Esther Leihang, SDC Champhai kaihhruainain National Voters’ Day thutiam chham rualna neih a ni  a.

National Voters’ Day thupui ‘No Voters Should be left behind’ tih chu Pu Remlalliana  Hnamte, ASO & AERO, 24-Champhai South A/C chuan sawizauin, Vote nei tupawh hmaih lova Roll-a dah luh anih zel theihnan BLO leh Election Office tangkawpin kum tin Special Summary Revision kalpui thin thu a sawi a. Roll Revision hlawhtlin zawk theihna atan Roll aluh diltute chu hotute tawiawm thaa, document felfai leh dik kenga hearing neihnaa inlan thin turin a chah a. Pu Remlallian Hnamte chuan Systematic Voters Education and Electoral Participation (SVEEP) sawizauna pawh neiin, SVEEP kaltlangin Voters Literacy siam tum anih thu leh hmalakna hrang hrangte a tarlang a. ECI duhdanin Vote nei tawh phawtin dik leh felfai taka, mahni chhia leh tha hriatna hmanga vote an thlak theihna turin SVEEP chu uar taka kalpui anih thu a sawi bawk.  

He hunah hian  Champhai District chhunga Assembly  Constituency panga atanga Booth Level Officer (BLO) titha zual thlanchhuahte; Pu K.Lalthlamuana, Headmaster, Lamzawl M/S, 21/4 Lamzawl BLO (Lengteng A/C), Pu Vanlalrawna, Headmaster LFS M/S, 22/6 Khawzawl IV (Dinthar) BLO (Tuichang A/C); Pu C.Vanlalduhawma, Teacher Pamchung M/S, 23/5 Pamchung  BLO (Champhai North A/C); Pu J.Lalngurliana, Teacher, Kelkang H/S, 24/24 Kelkang BLO (Champhai South A/C) leh Pu Tlangthanpara, Teacher, Sazep M/S 25/13 Sazep BLO (East Tuipui A/C) te hnenah Khuallianin  chawimawina Citation leh sum fai a hlan a ni.

National Voters’ Day 2019 lawmnaah hian Election Officials, Media, BLO leh Vote nei tharte an tel a ni.