Vawiin July ni 11, World Population Day pualin chawhma dar 10 khan Champhai District Hospital-ah July ni 11-23 chhunga hman tur Intensified Diarrhoea Control Fortnight (IDCF) leh World Population Day hawnna, Chief Medical Officer Dr C. Lalzirliana hova neih a ni a. Antidengue Month pulain dengue natna leh enkawl dan leh naupang kawthalo dona beihpui atana hmalakna dan tur bakah nute himna tura sawrkar laipui scheme duan thar, Pradhan Mantri Surakshit Matritva Yojana (PMSMY) chungchang inzirtirna, Champhai main centre huamchhunga Health Worker leh ASHA zawng zawngte tan I&PR Auditorium, CHANEM ah buatsaih a ni bawk.

Kumin World Population Day-ah hian thupui atan ‘Mawhphurhna hlen turin ruahmanna siam rawh’ (Fulfill responsibility) hman a ni a. World Population Day denchhena family planning chungchang inzirtirna beihpui leh naupang kawthalo umbo tura beihpui Intensified Diarrhoea Control Fortnight (IDCF) chu Champhai District CMO Dr C. Zirliana’n a hawng a. Thusawiin CMO Dr C. Zirliana chuan fate an thlen theih dinhmun sang ber thlenga hlan kai hi nu leh pate mawhphurhna a nih avangin tha taka enkawl zawhtawk fa nei tura ruahmanna siam a pawimawh hle a ni, a ti a. Chhungtin tan family planning mumal tak neih a tul thu leh family planning tum ber chu fa neih tlem ringawt ni lovin tha taka enkawl theih tawk fa neih te, chhang zing lutuk avanga phurrit awm theite pumpelh a nih theih nan chhang tih khatte a ni mah zawk a ti a. Nikum lamah IDCF hlawhtling taka kalpui a nih tawh thu leh kuminah pawh IDCF chhung hian naupang kawthalo vanga thihna a thlen loh nan thawktu zawng zawng te chu inpekna thar nen hma la turin CMO chuan kalkhawmte a sawm bawk.

Champhai District Hospital a World Population Day leh IDCF hawnna inkhawm kaihruaitu Senior Medical Officer Dr R. Lianmawia chuan kumin World Population Day leh IDCF thil tumte leh hmalak dan turte a tarlang bawk.

Vawiin vek khan I&PR auditorium CHANEM ah Antidengue Month pualin Champhai main centre huamchhunga Health Worker leh ASHA zawng zawngte tan dengue natna leh a enkawl dan inzirtirna neih a ni a. Hemi rual hian naupang kawthalo dona kawng a Health Worker leh ASHA-te mawrhphurhna inhrilhhriatna leh nute himna tura sawrkar laipui hmalakna thar, Pradhan Mantri Surakshit Matritva Yojana (Prime Minister’s Safe Motherhood Scheme) chungchang mithiamten zirtirna an pe bawk.

Tarlan tawh angin he kawthalo dona beihpuiah hian ASHA-te chuan an bial chhunga naupang kum 5 hnuai lam zawng zawngte tlawhchhuakin ORS an sem ang a, damdawiin hrang hrang leh anganwadi center thlan bikah te ORS leh Zinc Corner siamin a thlawna sem chhuah a ni bawk ang. Kut silfai pawimawhna inzirtirnan Primary leh Middle school zawng zawngah nitin hun hman a ni bawk ang.