Nimin (Dt 9.7.2016 Inrinni) chawhnu dar 1 khan Aizawl Press Club-ah Parliamentary Secretary Pu Joseph Lalhimpuia chuan Pu Lalzarzova Khiangte lehkhabu ziah Mizo tawng Grammar & Composition tih chu a tlangzarh.

Tlangzarh inkhawm-ah hian thu sawiin Parliamentary Secretary Pu Joseph Lalhimpuia chuan Mizo tawng a ral chuan Mizo hnam a ral ang a ti a. Mizo tawng dik humhimna atana tangkai leh pawimawh tur Pu Lalzarzova Khiangte lehkhabu ziah Mizo tawng Grammar & Composition tlangzarh a ni ta chu lawmawm a tih thu a sawi. Pu Mahima chuan Zosapte lo chhuah hmain sorkarin school-ah medium of instruction atan Bengali a hmang a. Zosapte an lo chhuah hnuah A AW B kan lo nei ta a, Zosapte hi lo chhuak lo se, Mizo tawng Grammar sawi tur kan nei kher lo mai thei a ni a ti a. Myanmar-a Mizo awmten Mizo tawng an thiam tha hle a, chhungkuaah uluk takin Mizo tawng an hmang a, Mizo nihna an tilang chiang hle a, Mizoram chhunga awmte hian tawng hman dik lamah tan kan lak a ngai hle a ni a ti bawk.

He lehkhabu tlangzarh inkhawma lehkhabu thlirlawkna neitu Pu Lalrinpuia Ralte chuan Grammar bu ziak thin tam takin an ziah loh te, tawngkam leh ziaka kan tih dik loh te pawh sentence nen chiang takin tarlan a ni a ti a. Mizo tawng Grammar & Composition kan neih hmasak ber nia a hriat thu leh Zirlaite leh Competitive Exam atana a tangkai dan tur a tarlang.

Lehkhabu ziaktu Pu Lalzarzova chuan Mizo tawng hian grammar fel tak a nei saa, kan pipute hla leh tawngkauchheh pawh hi grammar dik lo a awm meuh lova, kan tawng hi sap tawng nena khaikhin chuan a kalphung a danglam daih a, grammar term erawhchu sap tawng then dan kan tawmpui ve chauh a ni a ti. Grammar bu kan neih hi a la changtlung tawk lo hle a, zirlaibuah pawh telh a ni thin a. He lehkhabu hi zirlaite leh thuziak mite tan a tangkai hle dawn niin a sawi bawk.

Lehkhabu tlangzarh inkhawm hi Pu Lalrammawia Ngente in a kaihruai a, thu leh hla lama tui te leh ziak mi engemawzat an tel a ni.