Vawiin khan Lunglei DC Pu Abhijit Vijay Chaudhari, IAS chuan Hnahthial leh a chhehvel khua a hmalakna hrang hrang neih mekte chu a hmunah kal in a enfiah.
Lunglei DC chuan Hnahthiala KVK tlawh hmasa in, KVK farm-a thlai scientist-te chin leh enkawl laite chu a enpui a. Hemi hnu hian KVK-a scientist-te nen inkawmna hun an hmang a. Hlawhtlinna an neih te leh an hmachhawp te an lo hriattir a ni. Pu Abhijit Vijay Chaudhari chuan KVK hmalaknate a hmun ngei a hmu theia a awm chu a lawm thu a sawi a. Research an neih mekte chu mipuite’n an chhawr tangkai theih ngei a beisei thu sawiin, duhsakna a hlan nghal a ni.
Lunglei DAO Pu J. Rothanga pawhin KVK-in research a kalpui a, chuta tanga thil hmuh tharte chu Agriculture Department-in field-ah trial a nei chhunzawm a, hetiang avanga thawhhona tha nei thei an nih thu a sawi a. Inlaichinna tha an neih chhunzawm zel a duh thu a sawi bawk a ni. Inkawmna hun hi Senior Scientist and Head Dr. Lalmuanzovi’n a kaihruai a, scientist dangte leh Integrated Training Centre-a thawktute nen mipui tana chak zawka hna an thawh theih dan tur te an sawi ho a ni.
Pu Abhijit Vijay Chaudhari chuan Hnahthial Community Health Centre-a National Health Mission hnuaia OPD sak zawh luah mek chu a hmunah a tlawh leh a. CHC-a thawktu doctor-te nen inkawmna hun hmangin changtlung zawka siam a nih theih dan tur te an sawiho a ni.
Lunglei DC chuan CHC a tlawh zawhin, Hnahthial Chanmari Veng-a Lushai Engineers-te’n artificial grass an phahna tur field chu a tlawh nghal bawk a ni.
Mizorama lei (suspension bridge) sei ber tura ruahman, Tuipui D-a dawh mek December ni 13, 2014-a chim ta, dawh that leh mek chu a enkawltu engineer-te nen enfiah in July thla tawpa hman theih tura beisei a nih thu tarlan a ni a. Mipui tana hawn a nih hma in a thawktu company-in test a tum bakah Third Party atangin testing neih tum a ni tih tarlan tel a ni.
Lunglei DC chuan Kutkawk-a Coffee Nursery enkawl mek chu a tlawh a. He Coffee Nursery hi NLUP bultuma siam, Soil and Water Conservation Department-te enkawl a ni a. Nursery bed 270-ah seedling 1,20,000 awm in, tun thleng in cheng 4,70,000 bawr vel sen tawh a ni. Nakum March 2017-ah NLUP beneficiary leh coffee lama tui mi te hnenah sem hman theih tura beisei a ni bawk.
