Vawiin chawhnu khan Chief Minister Pu Lal Thanhawla, President, Cricket Association of Mizoram (CAM) nibawk kaihhruaina hnuaiah CAM chuan Aijal Club ah General Body meeting an nei.

Pu Lal Thanhawla chuan Mizoramah cricket in a hma a sawn zel thu sawiin pawl pawhin kawng hrang hrangin changtlunna a nei zel a ni a ti a. Sihmui a Suaka Cricket Stadium chu phuisui  zawka buatsaih anih mek thusawiin he Cricket Stadium tha tak kan neih hi tha taka enkawl chhoh zel leh tih changtlun zel hi a pawimawh a, hemi atan hian CAM leh a hnuaia Affiliated Club ten rilru leh ngaihtuahna kan sen a tul a ni a ti. India a cricket enkawltu pawl Board of Cricket Control of India (BCCI) hnuaia CAM in affiliation a neih theih nan tunhnaiah tha thar thawhin nasa takin theihtawp chhuah in hma lak mek a nih thusawiin hun reilo te ah BCCI affiliation hi kan neih ngei ka ring a ni a ti a. Karleh a Affiliation chungchanga BCCI hotu thenkhat ten Mizoram rawn tlawh an tum chu an thulh leh thu member te hrilh in an hun neih hmasak berah Mizoram an lokal dawn a, chutah chuan cricket lama kan ruhrel leh hmasawnna te an rawn thlithlai dawn a, affiliation hi kan neih ngei a beiseiawm a ni a ti.

CAM General Body Meeting ah hian Pu Mamom Mazumdar, General Secretary chuan kum 2015-16 chhunga pawl hmalakna leh hmasawnna te Secretary Report ah a tarlang a, Pu Zosangliana, Treasurer in pawl sum dinhmun Finance Report ah a tarlang bawk a ni.

Agenda 8 chhawpchhuah - qualified coach neih chungchang te, Rules neih ang angte tha taka kenkawh chungchang te, umpire indaihlohna chungchang te, CAM Office bearers te inthlan chungchang te, CAM Technical Rules thenkhat siamrem chungchangte leh Aizawl khawpui chhunga Training Ground neih chungchangte hi chipchhiar leh zau takin an sawiho a ni.

Tlai lamah kum 2016-18 chhunga an pawl hruaitu inthlanna chu Mizoram Journalists' Association te buaipuina hnuaiah neih a ni.

Cricket Association of Mizoram hi kum 1992 khan din alo ni tawh a ni.