Nimin atanga ni hnih awh Hmarchhak huapa Hriselna chungchang intawhkhawmna leh sawihona ‘North East Connect – Health Care Conclave, 2016’, NEDFi Convention Centre Guwahati-a, a vawikhatna atana Federation of Indian Chambers of Commerce and Industry (FICCI) leh Public Health Foundation of India (PFHI) tangkawp ten an buatsaih chu vawiin khan Health Minister Pu Lal Thanzara chuan khualzahawm niin a hmanpui.
Health Minister Pu Lal Thanzara chuan India in hriselna leh damlo enkawlna kawngah hmasawnna tam tak a neih te chu a lawm leh a chhuanawm hle thu sawiin ramchhung hmun thenkhat ah te heng hmasawnna hi pheikhai rual taka a thleng lo erawh hi chu a lungchhiat thlak a ni, a ti a. Hriselna chungchanga Hmarchhak bial a hnufual dan teh khinin, Hmarchhak state zawng zawng a medical college awmte belhkhawm hian India ramah state lian pawla, state pakhata an medical college neih zat pawh kan la tluk lo a ni a ti a. Hmarchhak bial in ramchhung hmun dang te angin hmasawnna kailawnah an ruala ke a pen ve theih nan FICCI leh PHFI hruaitu te chu an ngaihtuahna leh rilru senga, kawng hranga hranga state te thawhpui dan kawng dap turin a ngen a. Mipuite tan thil tha an rawn thlen thei dawn a nih chuan Mizoram chu a inhawng hle a ni, a ti bawk.
Pu Lal Thanzara chuan Centrally Sponsored Scheme – Rashtriya Swastha Bima Yojana (RSBY) bakah Mizoram chuan sawrkar hnathawk lo te tan health insurance ruahmanna Mizoram State Health Care Scheme a kalpui thu sawi langin, heng ruahmanna pahnih avangin dinhmun hniam a ding mipui tam tak ten hriselna kawnga innghahna tlak insurance an neih theih phah a ni, a ti.
Health Minister chuan Mizoram leh Hmarchhak state thenkhatah cancer hrang hrang a hluar thu sawi langin duh angin khawl leh hmaraw tha kan neih loh avangin ram chunga a hmunpui leh khawpui lian ah te inentir turin mi tam tak an kal a ngai thin a, hei hian state te sum dinhmunah nghawng lian tak a nei fo thin a ni, a ti a. Hlawkna ngawr ngawr ngaihtuah lova mipui te hamthatna leh mipuite tanpui dan kawng ngaihtuaha, hemi kawngah hian Hmarchhak state te pui turin he hunah mithiam leh mi challang kalkhawmte chu a sawm a. Mipui mimir tam zawk leh mirethei ten hriselna kawnga hmasawnna leh inenkawlna te an banphak theih nan an thilsiam leh an ruahmanna te man tlawm leh engtik lai pawha pan theih leh lei thei tura chhawpchhuah thin turin a chah bawk a ni.
Programme zawh hian Pu Lal Thanzara leh FICCI hruaituten inkawmhona hun tawite an nei zui nghal a. Health Minister hian Mizoramah hetiang programme rawn buatsaih ve turin a sawm a, an ni lam chuan nakum velah Roadmap siamin programme lo duan an tum thu an hrilh a. Health Minister hian PFHI hruaitute pawh hriselna kawngah Mizoram tan theihtawp chhuahpui turin a sawm bawk a ni.
Vawiina programme ah hian Hmarchhak state hrang hrang Health Minister te chu an tel kim hle a. India ramah sumdawng leh industry liante intelkhawm FICCI leh India rama vantlang hriselna kawnga thawktu leh thawh hlawk pawl lian PHFI a hotu lawk te bakah ramchhung leh rampawna hriselna kawnga thawk mi challang leh milar engemaw zat an tel bawk a ni.
North East Connect – Health Care Conclave 2016 ah hian damlo inenkawlna tha zawk (quality health care) leh hriselna kawnga thawktute tha tih chak leh an intuaihriamna (capacity building) chungchangte; mitin tana inenkawlna huapzo (universal access to healthcare) chungchangte; khawvel hmun changkang zawkte anga hriselna ruangam leh ruhrel din a nih theih nan a sum hnar dap (financing world class healthcare infrastructure) chungchangte leh damlo te tan inenkawlna kawng dang dap (prospect of alternative medicine) chungchangte hi mithiam kalkhawmte hian sawihoin hma lak dan tur kawng hrang hrang te an sawi ho bawk a ni.
