Vawiin chawhma dar 11 khan Lawngtlai CMO Office-ah Pradhan Mantri Surakshit Matritva Abhiyan (PMSMA) chu Lawngtlai District Bawrhsap Dr A. Muthamma-in a hawng.

Khuallian Dr A. Muthamma chuan nu nau paite himna tur leh enkawlna tur scheme thar ?ha tak mai duan a ni chu lawmawm a tih thu leh Lawngtlai District-ah pawh ram chhung hmun dangte ruala a hawnna hun hman a ni ve thei chu lawmawm a tih thu a sawi a. Raipuar zawng zawng hi mi bik an ni a, enkawlna tha bik an phu vek tih sawiin, PMSMA hnuaiah raipuar tana a thlawna inentirna thla tin ni 9-naa buatsaih ziah a nih tur thu a sawi. Hmeichhe nau pai reng rengin sawkarin a voh bikna an chanvo dik tak an chang tur a ni tiin, Bawrhsap chuan he scheme thar hian raipuarte tana nun nuam zawk a siam a, nausen pianghlim thihna leh nau chunga nu thihna te pawh a tihtlem theih ngei a beisei thu a sawi.

He scheme thar hawnna hun hi Lawngtlai District Chief Medical Officer Dr HC Thangkima'n a kaihruai a. District Medical Superintendent Dr Lalchhuankimi'n powerpoint presentation hmangin scheme thar chungchang sawi fiahin, Dr C.Lalduhsaka'n "High Risk Pregnancy" awmzia a lem nen sawi a fiah bawk a. Senior Medical Officer Dr S.Thaizi chuan lawm thu sawiin, hun a khar a ni.

Vawiina scheme thar hawnnaah hian District Hospital leh CMO staff te, health worker te, ASHA leh anganwadi worker te bakah, thla sarih chin nau pai eng emaw zat an tel a. Zawhna leh chhhanna hun te pawh hman a ni.

Tun dinhmunah India ramah hian raipuar vaibelchhe thum vel awm anga chhut a ni a. Chu'ng mite chuan enkawlna tha tak an dawn theihna tur te, an harsatna tawh thin hrang hrangte chinfelsak a, him leh dam taka nau an neih theihna tur te, tha taka anmahni leh an fate enkawl thei tura kaihhruai te chu PMSMA thil tum pawimawh tak a ni.

Lawngtlai District-a PMSMA scheme bul tan nan hian nimin leh vawiin lam khan raipuar eng emaw zat chu a thlawnin en fiah an ni a. An hriat tur pawimawh chi hrang hrang zirtir an ni bawk.