Health & Family Welfare Minister Pu Lal Thanzara chuan kumin World Population Day puala Health Department buatsaih – Aizawl Thunder Bike Rally chu tukin zing khan Ngaizel-ah a vailiam.

Health Minister chuan kumin World Population Day atana WHO-in thupui atan a thlan “Mawhphurna hlen turin ruahmanna siam rawh” tih chu chhungkaw din tur leh din mekte pawhin ngun taka kan ngaihtuah chian ngai a nih thu a sawi a. “Family Planning hi thenkhat chuan fa neih tlem lam ngawr ngawr zirtirna emaw kan tih thin hi a ni lo a, ruahmanna tha tak hnuaia chhungkaw din leh chhungkaw dinhmun mil zela fa neih chu a tum zawk a ni’, Minister hian a ti a. Indanna te, insiam bakah nau nei theilo ten fa an neih theih nan tanpui thlengin Family Planning hian a huam thu a sawi a. Mahni kutke a din theih hnua chhunghkaw din ngei hi mitin tan mawhphurhna lian tak anih avangin, kan fa neih dan kalhmangah te fing leh remhre zawka ngaihtuahna seng thar turin kalkhawmte chu a sawm a ni.

He hunah hian Dr. K. Ropari, Principal Director, H&FW Department chuan thu sawi bawkin, khawvel a mihring lo pung chak em em avanga ei leh bar ah leh nitin nunphung ah buaina (population explosion) a thlen phah loh nan chhungkaw din kawngah ruahmanna fel tak siam theuh a pawimawh thu a sawi a. “Plan” mumal tak nei lo a chhungkaw din hian chhungkaw hlimna leh hriselna thlengin nghawng a neih theih thu leh, tun mai nilo nakin hun – kan tu leh fate lo than lenna tur khawvel thlir chungin chhungkua din a pawimawh thu a sawi a ni.

Vawiin Bike Rally-ah hian Ngaizel atangin Bawngkawn thleng Aizawl Thunder-te chu tlan in, Bawngkawn atanga let lehin Vanapa Hall-ah an tawp a. Rally Flag-off na hun hi Dr. Vanlalsawma, State Programme Officer (RCH) chuan kaihruaiin, he hunah hian H&FW Department hotute leh Staff-te bakah Hmunthar Kohhran Hmeichhiate an tel a ni.