Vawiin khan Health Minister Pu Lal Thanzara chuan Aizawl Civil Hospital Paediatric OPD ah kawthalo do beihpui Intensified Diarrhoea Control Fortnight (IDCF) a hawng.
Pu Lal Thanzara chuan National Health Mission in a tum pawimawh ber pakhat chu naupang thihna tihtlem a ni a, kawthalo hi naupang kum 5 hnuai lam thihna za zela sawm lai thlentu a nih avangin kawthalo dona programme kalpui hi thil tul tak a ni, a ti. Kum 2014 atanga tanin kawthalo do beihpui hi kum 2 kalpui a ni tawh a, a hlawhtlin avangin zawngchhang thlak hlein sawrkarin a hriat thu leh fur tui tam laia hluar bik kawthalo do nan July ni 11 atanga 23 thlan a nih thu a sawi a. IDCF 2016 thu ken ‘Kawthalo vanga naupang thihna pumpelh’ chu a hlawhtlin ngei theih nan Health Minister Pu Lal Thanzara chuan mitinte thawhpuiah a sawm a ni.
National Health Mission hnuaiah IDCF kaltlang hian India ramah kum 2014 khan naupang kum 5 hnuai lam nuai 200 leh kum 2015 khan nuai 650 awmna chhungkuaah Accredited Social Health Activists (ASHA) ten kawthalo laka inven dan, enkawl dan leh ORS siamdan te zirtirin ORS an sem a. Sawrkar department hrang hrang Social Welfare, PHE, School Education, AMC leh VC te nena thawkhovin Middle School zawng zawngah he Fortnight denchhen hian nitin school naupang ten kutsil dan dik an zir dawn a. Mizoram chhung hmun hrang hranga damdawi in leh Anganwadi Centre thlan bikah Zinc-ORS corner siam niin a thlawnin Zinc leh ORS a lak theih dawn a ni.
ASHA ten naupang kum nga hnuai lam awmna in zawng zawng an tlawhchhuak dawn a. ORS leh zinc an sem pahin faina leh thianghlimna chungchang te, kawthalo enkawl dan leh damdawi in pan a tul hun te hrilhin ORS siam dan leh kutsil dan dik an zirtir bawk ang.
Kawthalo do beihpui hawnna inkhawm hi Health Principal Director Dr.K.Ropari’n a kaihruai a. Kawthalo do dan tur kaihhruaina animation tawite tih chhuah a ni bawk. Naupang specialist Dr.Lalrochhunga’n kut sil dan tur dik kalkhawmte a zirtir a. RCH State Programme Officer Dr. Vanlalsawma chuan Intensified Diarrhoea Control Fortnight beihpui thlak dan tur tlangpui kalkhawmte a hriattir a, National Health Mission (NHM) Mission Director Dr.K.Lalbiakzuala’n lawmthu sawiin hun a khar a ni.
