1177/2022-2023
Champhai, the 7th July, 2022: District Programme Office, Women & Child Development, Champhai District buatsaihin vawiin khan kum tling lo naupang, dan bawhchhiatnaa inhnamhnawih emaw, puha awmte buaipui, venhim leh enkawl dan chungchang zirhona, 'Escort & Management of Children in Conflict with Law' tih thupui hmangin I&PR Conference Hall, CHANEM-ah buatsaih a ni.

He hun hi Pu Lalrinmuana, District Programme Officer, ICDS, Champhai District chuan a kaihruai a, District pahnih District Child Protection Officer-te, Champhai District leh Khawzawl District atangin Juvenile Justice Board (JJB) member, Child Welfare Committee (CWC) member-te bakah Rose Children Home, Genesaret Gospel Home leh Observation Home, Champhai atangin Superintendent theuhte an tel a ni.

Meeting hi Khawzawl District Child Protection Service (CPS), Mission Vatsalya indan hnua District pahniha hemi lama thawktute inhmuhkhawm vawikhatna a ni a. Khawzawl leh Champhai District CPS, Mission Vatsalya hnuaia Board leh Committee member-te tana inzirtirna leh intuaitharna bakah, inpawhtlanna leh thawhhona tha zawk a awm theih nana buatsaih a ni a. He hunah Khawzawl District-ah JJB, CWC te awm hrang tawh mahse naupang kum tlinglo baihvaite enkawlna Children Home leh kum tlinglo dan bawhchhia/puhte enkawlna Observation Home-a awm rih loh avangin tuna hmunhma neih mekte inhmantawm zel dan tur chungchangte sawiho a ni a. District pahnihten naupang kum tlinglo, dan bawhchhiate leh hemi kaihhnawiha puhte buaipui, venhim leh enkawl mai bakah, naupang venhim ngaite tana thawhho dan tur tha zawkte an sawiho bawk a ni.