1176/2022-2023
Aizawl, the 7th July 2022: Ni hnih awh tur Refresher Course on Environment Education, Aizawl District huam chhunga Primary School zirtirtute tana buatsaih chu ni 7 July 2022, chawhma dar 10. 00 khan Dr Lalzirmawia Chhangte, School Education Secretary chuan SCERT Auditorium-ah a hawng.

Dr Lalzirmawia Chhangte chuan khawvel ah ecology leh environment humhalh lamah nasa taka tan lak a ni a. Mizoramah pawh he mi lama kan thanharh tawlh tawlh a pawimawh thu a sawi a. Kan ecology kan vawnhim hian keimahni tan vek a ni a, kan tih chereua kan vawnhim loh chuan a tuartu tur chu keimahni tho kan ni a. Chhiatna tam tak kan tawrh thin hi kan insiam chawp, man made disaster a awm thin a ti. Naupangte hnenah pawh environment humhalh leh duat a pawimawhzia kan zirtir mawlh mawlh a tul a, chutiang a thlen theihna atan tuna Refresher Course kan neih pawh hi zirtirtute kan intahhriamna tur a ni tiin kalkhawmte a fuih a ni.

Refresher Course hawnna inkhawm hi Pi Laldawngliani Chawngthu Director SCERT in kaihruaiin Key note address a pe a, Environment humhalh hi chu Education policy hrang hranga pawh hmun pawimawh tak a chan zel thu te leh Natioanl Education Policy 2020 pawhin a ngaihpawimawh thu a tarlang. He programme hi kan environment humhimna kawnga naupangte nasa leh zuala zirtirna a awm theih nan SCERT, Samagra Shiksha Mizoram leh Central YMA, te tangkawpin a buatsaih a ni a. Refresher Course hi Batch 4 a neih tura ruahman a ni a, 22 July 2022 thleng a awh ang.

Attachment

  • Loading attachment...