1178/2022-2023

Aizawl 7^th July, 2022 : New Delhi a cham mek Dr R Lalthangliana, Health & Family Welfare, Commerce & Industries, Higher & Technical Education changtu Minister chuan a department hmachhawp thil hrang hrang bawhzuiin vawiin khan sawrkar laipui a dawr a, Minister hi Health & Family Welfare Board Vice-Chairman Dr ZR Thiamsanga, MLA leh Road & Infrastructure Development Board Vice-Chairman Er. H. Lalzirliana ten an tawiawm a ni.

Dr R. Lalthangliana hian vawiin chawhma dar 11:00 khan Ministry of Micro, Small & Medium Enterprises (MSMEs) dawrin MSMEs Secretary Pu B.B. Swain a hmu a, Mizorama Industry hrang hrangte tihchangtlun a tul zia sawipuiin, Luangmual (Aizawl), Lunglei, Champhai leh hmun hrang hranga Industrial Growth Centre-te tihchangtlunna tura Project an thehluhte tihhlawhtlin ngei a nih theihnan theihtawp lo chhuah turin a ngen a, MSMEs Secretary hian chak taka bawhzui a tum thu a lo sawi a ni.

Champhai District-a cheng ten eizawnna ngelnghet leh rin tlak an neih a, sumdawnna kumhlun an neih theih nan thlai leh thil pawimawh dang chin tur, uphill area (hmun sang) ngeih si hlawhtling taka kalpui a nih theihnan MSMEs hawi zawngin hmalakpui turin an thlen a, hetiang bawk hian Aspirational District, Mamit-ah pawh Mau (bamboo) a that duh avangin Mau hman tangkai dan turte an sawipui bawk a ni.

Hemi zawh chhun dar 12:00 hian Dr.Thangtea te hian Land Port Authority of India (LPAI) Chairman Aditya Mishra, IPS an hmu leh a, Mizorama Border Trade tihhmasawnna chungchang Minister-in thla kalta (June) a Delhi a kal tuma a sawipui leh rawtna a thlen chungchangte a sawipui leh a, LPAI Chairman hian Dr Thangtea ngenna an bawhzui thu sawiin Kawrpuichhuah ICP tihchangtlunna tur DPR awm sa cheng vaibelchhe 170 chu ennawn (revised) a nih hnuah cheng vaibelchhe 552.25 a tihpun a nih thu a lo sawi a, he DPR hi kar hnih kalta khan Ministry of Home Affairs-ah an thehluh tawh thu leh a hlawhtlin ngei beiseina an neih san thu a lo sawi a, Zokhawthar LCS leh Zorinpui LCS tihchangtlunna tur DPR an siam mek thu Minister hi a hrilh bawk a ni.

Minister hian Ministry of Home Affairs-a Additional Secretary Piyush Goyal, IAS hmu chhunzawm nghalin LPAI in Kawrpuichhuah ICP tihchangtlunna tur DPR an thehluh leh Border Trade kaihhnawih thil pawimawh dang an hnena thehluh te chak zawk leh awmze nei zawka lo bawhzui saka hma lo lakpui turin a ngen a, hei ngenna hi lo ngai pawimawhin theihtawp chhuah a tum thu MHA Additional Secretary hian a lo sawi a ni.

Hemi hnu hian Dr Thangtea hian Ministry of External Affairs dawrin, Union Foreign Secretary Pu Vinay Mohan Kwatra, IFS nen an inbia a, Kawrpuichhuah ICP bakah Indo-Bangladesh border line-a Land Port Authority of India-in hmalakna chak taka an kalpui mek chungchang sawipuiin, awmze nei zawka hmalakna a kal chak theih nan he hmalakna in a kaihhnawih Ministry hrang hrang – Commerce & Industries, Home Affairs, Land Port Authority of India, External Affairs leh Bangladesh High Commission hotute nen inrawnhona (meeting) ko tura ngenin, an tih theih chuan vawi khat thutkhawmah awmze nei takin thil a kalpui theih a beiseiawm tih a sawi a, Foreign Secretary chuan hei hi lo ngai pawimawhin a hma thei ang bera meeting koh a lo tiam a ni.

Vawiin chawhnu khan Union Minister of Health and Family Welfare Dr Mansukh Mandaviya chu a pisa-ah Dr Thangtea te hian an kawm bawk a, he hunah hian ZMC Registrar Dr Jane Ralte-in Minister hi a tawiawm a, Zoram Medical College tihchangtlunna tur Concept Paper an buatsaih chi hrang hrang Union Minister hnenah hian thehlutin, Mizoram sawrkara Health & Family Welfare Department hmalakna kawng hrang hrangte an sawipui bawk a ni.