2360/2023-2024

Champhai the 18th October, 2023 – Mizoram State Museum buatsaih Govt. Gandhi Memorial High School-a Museum Exhibition leh Awareness Campaign neih chu vawiin khan Champhai Bawrhsap Pu James Lalrinchhana'n a hawng.

Hawnna hun Pu HT Vanlalsawma kaihhruaiah hian Pu James Lalrinchhana Champhai Bawrhsap chuan Champhai District chu Pipute sulhnu pawimawh tak tak awm tamna a nih avangin Museum Awareness neih a pawimawh thu sawiin Pipute sulhnu hrang hrang hmuh tur mahni hmun ngeia a awm chuan Mizo Culture hriatthiamna a thlen a, Mizo nunze mawi hriat rengna a hnut chhiah tih sawiin Mizo history te, hmanrua an lo hman thin leh thuam an inbel thinte zirna hmun atan Museum chu thil pawimawh tak a nih thu a sawi bawk.

Pu James Lalrinchhana chuan Competitive Exam hmachhawn turin mahni culture leh history hre lo tan a tlin theih tawh loh tiin, hnam ropui tak takte an ropui chhan chu an to bul an hriatchian vang a nih thu leh hnam rohlu leh thil hlu te an dah pawimawh tlat avang a nih thu a sawi a. Pipuite sulhnu humhalh pawimawh zia sawiin Culture ti dal thei tam takte'n inchim ralna a thlen nasa zawk a, thangthar leh zirlaite chu an tobul pipute sulhnu zir chian nachang an hriat chuan Mizo hnam chu chimralna tur lakah a veng dawn tih a sawi bawk. Bawrhsap chuan Champhai District chu ruihhlo tawlhna hmun Golden Triangle kalkawnga awm a nih avangin ruihhlo laka inhnamhnawihna chance a sang hle ni-a sawiin Ruihhlo laka fimkhur turin zirlai kalkhawm te a chah bawk.

Thusawitu dang Pu C. Lalrinfela, Curator, Mizoram State Museum, Arts & Culture Department chuan Govt. GM High School chu Mizorama Museum nei hmasa ber school an nih avangin Museum Exhibition buatsaih a nih thu sawiin Museum chuan hmanlai atanga hnamin thil hlu a neihte hlutna phochhuah chu a tum ber a nih thu a sawi a, hnam rohlu chi hrang hrang tarchhuahna a nih avangin Museum chu a hlu hle tih sawiin chhiar chawp ngai lovin en maia hriat zung zung theih a nih angin Museum chu zirna run pawimawh tak a nih thu a sawi bawk.