2361/2023-2024

2023 Khuangchawi thla ni 18: Mizoram Legislative Assembly Inthlanpui, 2023 neih tura inpuahchahna kal mekah vawiin khan Kolasib DC Video Conference Room-ah District Election Officer Pu John LT Sanga hovin 1st Randomisation of Electronic Voting Machine (EVM) neih a ni a. Kolasib District chhunga assembly constituency pathuma EVM (Control Unit, Ballot Unit leh VVPAT) hman turte thliar fel a ni.

Kolasib DEO Pu John LT Sanga chuan inthlan buatsaih kawnga Election Commission of India ruahmanna chu a felfaiin, a rin tlak em em tih sawiin, EVM hman turte chu a hman tlak leh hman tlak loh endik vek a nih hnuah a hman tlak chinte chu khawl hmangin a hmanna tur constituency thliar fel hmasak a ni a, chumi hnuah a hranin constituency tina mite chu khawl hmang bawkin a hmanna tur polling station thliar a ni leh ṭhin, a ti a. EVM-te chu khawih chingpen leh mahni duh dan dana tih kual theih a nih loh thu a sawi.

He hunah hian election official-te bakah, political party hrang hrang ai awhte an tel a. First Level Checking (FLC) endikna aṭanga EVM hman theih tura dah hran sate chu a hmanna tur constituency tih fel a ni a. EVM hman tur hi Kolasib District chhunga polling station 89 atan set (CU, BU leh VVPAT) 89 bakah, a ṭul thulha hman tura thlavenga dah hran (reserve) atan CU 16, BU 16 leh VVPAT 25 chu thliar fel a ni a. ECI-in inkaihhruaina a siam angin, reserve-a dah tur hi CU 20%, BU 20% leh VVPAT 30% anga chhut a ni.

1st randomisation tih zawh hian political party ai awhte hriatpuinain strong room-a EVM-te chu randomisation zulzuiin a hmanna tur consituency ṭheuhvah dah fel a ni a, kalh hnan leh nghal a ni.

EVM hmanna tur polling station thliar felna, 2nd & final randomisation chu October ni 23, 2023 (Thawhṭanni) khian buatsaih tura ruahman a ni.