Vawin atang khan Skill Training of Rural Youth (STRY) scheme hnuaiah ATMA, Champhai District, State Agricultural Management & Extension Training Institute (SAMETI) Mizoram leh National Institute of Agricultural Extension Management (MANAGE) Hyderabad tangkawp buatsaihin “Oyster Mushroom Cultivation Techniques” tih thupui hmangin I & PR Conference Hall, Champhai-ah training  neih tan a ni. Thintlang lam thalaite tana Pa khawi  training  Programme hi Ministry of Agriculture and Farmers Welfare, Government of India bultum sak a ni.

Hawnna inkhawmah DIPRO Champhai Dr Lallawmkima chuan Pa khawi zir tura kalkhawmte chu an vanneihna chhawr tangkaia Pakhawi chu eizawnna ngelnghet atana neih tum turin a fuih a. Mithiam tak takte atanga zirtirna an dawnte mahni veng leh khua theuhah zirtir chhawngtu nih tum tura fuihin, mamawh leh hriat duh an neih apiangin department lam mithiamte biak zel mai tur a ni, a ti a. Training hunt ha leh hlawkthlak tak nei turin duhsakna a hlan a ni.

Pu C.Lalhriatpuia, Project Director, ATMA Champhai District Pa khawi chuan hun   duh rei loh mai bakah hralhna a awm that avangin a lar tawh hle thu a sawi a. Training pe tura rawihte pawh mithiam tak leh training tha tak nei tawhte an nih anvangin an hnen atanga  tha taka inzir chhuah tum theuh turinn a chah bawk a ni.

Pi Vanlalduati, Scientist, KVK Khawzawl pawhin thusawiin Agriculture hnuaia training hrang hrang kalpui thinah thalai lamte tinzawn an nih thin thu sawiin, hei hian thalai hna neilo leh ruihhlo leh a kaihhnawih laka ven kawngah a puih theih vang anih thu a sawi a. Thingtlang   thalaite eizawnna siam sak tuma hmalak mek a ni a, heng zingah hian Pa khawi zirtir chu hmalakna pakhat a ni a, Pa khawi hun chhung chu a reiloa,  a awlsamin hralchhuahna pawh a tha hle a ni a ti bawk.   

He training Programme-ah hian Nl. Vanlalduati, Scientist (Soil Science)KVK Khawzawl leh ATMA, Champhai District a mithiamten theory leh practical-in zirtirna an pe a. Mi 15 aia tam he training-a tel duh an inziaklut a ni. He programme in a tum ber chu thingtlang mi a bik takin tunlai thangthar nula tlangval ten Agriculture leh allied sector hnuaiah skill training lamah mahni a intodelh thei tur leh enzawnna tling thiamna nei thei tur khawpa Skill Training hmanga hmalak a ni.