No.6070/2020-2021

Dated Champhai, the 14th October, 2020: Champhai District Legal Services Authority bultumin pawikhawihna tuara vanduai te’n zangnadawmna an hmuh theih dan tur ‘Victims of Crime Compensation Scheme’ chungchang chu vawiin chawhnu khan Bawrhsap Pi Maria C.T Zuali hovin I&PR Conference Hall-ah ngaihtuahho a ni.

He hun Pi Lalrochami Ralte, Secretary, District Legal Services Authority (DLSA) kaihhruaiah hian misual kut tuara vanduaina tawkte hnena zangnadawmna pek dan tur chungchang sawiho niin, Undivided Champhai District atanga zangnadawmna diltu 12 te tawrh dan chu uluk taka zirchian niin pek tlak an nih leh nih loh ngaihtuahho a ni a. Mizoram Victims of Crime Compensation (Amendment) Scheme, 2016 dungzuiin zangnadawmna pek zat turte pawikhawih dan a zir zelin bituk a ni a. Pawikhawihna tuara vanduai zangnadawmna dil 12 te chu ngun taka zirchian an nih hnuah heng zinga 10 te hi State Legal Services Authority (SLSA) hnena thlena, a tul anga zangnadawmna pek tura pawm an ni.

Vawiin zangnadawmna diltu 12 zinga 4 te hi Session Case, Court-in a dilsakte an ni a, Home in a dilsak 3 leh a tuartu lam atanga dil 5 te a awm bawk. Vanduaina tawkte hi mi kut tuara thi, kut thlak tuar, pawngsual tawk leh naupang khuaikhemte an ni a. Zangnadawmna mi 10 te hnena pek tura tih hi avaiin Rs 31,25,000/- a ni. Zangnadawmna hi an tawrh nat dan a zira pek thin a ni a, vawiin hian a hniam ber Rs 75,000/- atanga a sang ber Rs 4,50,000/- thlenga pek tura remtih a ni. Zangnadawmna diltu chu BPL chhungkuaa mi an ni tur a ni a, thil thlen atang thla ruk chhungin lehkha ngai kimchang thil telin dilna hi thehluh tur a ni.

He hunah hian Champhai DC Pi Maria C.T Zuali, SP Pu Rex Zarzoliana Vanchhawng, DLSA Secretary Pi Lalrochami Ralte, DIPRO Dr.Lallawmkima, District Court APP Pu Lalchhuansanga Sailo bakah Sub-Headquarters YMA (SYMA), Sub-Headquarters MHIP leh District MUP aiawhte an tel a ni.