No.6069/2020-2021

Aizawl, the 14th October 2020: Zan hnih riaka Chalfilh bial chhung fang mek Speaker Pu Lalrinliana Sailo, bialtu MLA ni bawk chuan tukin khan Khawlian-ah Primary Health Centre(PHC) sak tanna tur hmunhma laih mek a tlawh a; tlailamah Luangpawnah VC House sak thar a hawng bawk dawn a ni.

Ministry of Tribal Affairs atanga sum hmuh hmanga sak tur PHC, Khawlian hmunhma laih mek a endiknaah hian Speaker Pu Lalrinliana Sailo chuan hun rei tak atanga mamawh tawh Damdawi In changtlung tak hmarlam tlangdung khua ten Khawlianah an nei thei tur chu a lawmpui tih a sawi a. He Damdawi In hi a chhehvel khua a mite tan mai ni lo ramri lehlama Mizo te leh a mamawhtu a piang tan a tangkai dawn hle a ni a ti. Speaker chuan hmasawnna atan Hrisel a pawimawh tih sawrkarin a hriatchian thu sawiin mipui hriselna kawnga hmalakna te pawh Chief Minister chuan a ngaipawimawh hle a ni a ti a. Sawrkarin mipui te hriselna leh himna a ngaih pawimawh em avang hian theihtawpin hma a la a khawvel pum huap tibuai mek tu Covid 19 lakah te pawh Mizo zingah tumah nunna chan kan la awm lo a A lawmawm tak zet a ni a ti.

Speaker hian nimin lam khan Phullen leh Phuaibuang a tlawh tawh a; vawiin hian Khawlian, NE Tlangnuam, Daido leh Luangpawn khua te a tlawh dawn a. Naktukah hian Suangpuilawn, Lamherh, Vanbawng, N.Khawlek, Khanpui, Khawruhlian leh Sesawng te a tlawh dawn a. Khawtinah sawrkar hmalakna kal mek te a endik bakah VC te leh khawtlang hruaitute kawmna hun nei zelin an mamawhte a ngaihthlaksak a. PWD Engineer te pawhin Speaker hi tawiawmin khaw kar kawng chhe lai siamthat dan tur te pawh an endik nghal zel a ni.