1592/2026-2027

Champhai, dated 31st July 2026: District Treasury Office, Champhai bultumin vawiin khan Pension Payment Order (PPO) mahni duhthua hlan let chungchang inhrilhhriatna hun Thangtea Hall, Champhai Kahrawtah hman a ni a, Pu Mohammad Aaquib, District Bawrhsap chuan khuallian niin a hmanpui.

Khuallian, Pu Mohammad Aaquib chuan thusawiin, Family Pension hi chhungkaw tam takin tangkai tak an hman mek laiin mi thenkhat chuan dik lo takin an hmang tih Mizoram sawrkar chuan a hrechhuak tih sawiin hetianga dik lo taka pension lo la thin te hian sawrkar pawisa tam tak dik lo takin an ei ral a ti a, dik tawk lova pension an lak theih nan lehkha pawimawh lem an siam thin thu a sawi a, hetiang a dik lo taka pension lak thin hi tihbo a nih theihna tur chuan sawrkar hnathawkte chauh ni lovin tlawmngai pawl hrang hrangte leh mipuite an pawimawh vek thu a sawi. A bik takin, khawtlang hruaitute leh YMA bakah Kohhran hruaitu te chu lehkha pekchhuah kawngah fimkhur turin a chah a, anni berin lehkha an rawn siamsak tawh hnuah sawrkar department a thawkte chuan lo hnar kha thil theih loh tluk a nih thin tawh thu a sawi a, fimkhur turin a chah.

September ni 30 hnulamah chuan Mizoram sawrkarin District tin ah District level task force a din tur thu sawiin, task force te hian chak takin hma an la dawn a, dik lo taka pension la te an dim dawn lova, mipuite pawhin hetianga dik lo taka pension la an awm a nih chuan report hreh lo turin a sawm a, september ni 30 a ral hmaa pension dik lova la te chuan an pension surrender ngei ngei turin a ngen a, an surrender lova, man an nih leh si chuan inngaihna thiamna a awm loh tur thu a sawi.

Pi Vanlalhruaii, Treasury Officer chuan kalkhawmte lawmna thu a sawi a, sawrkar in dan dik tawk lova Pension la a ngaihpawimawh thu sawiin dan dik tawh lova pension la an lo awm a nih chuan thla thum chhung inngaihhnathiamna hun hawn chhunga an pension an hlan let a nih chuan hremna an chunga lekkawh a nih dawn loh thu sawiin, sawrkarin khauh taka a kenkawh tur thu a sawi a, kalkhawmte pawh uluk taka resource person te thusawi ngaithla az dik lo taka pawisa la lut tur vengtu an nih theih thu a sawi.

Pi R. Lalthantluangi, Accounts Officer (Pension Scheme) hnen atangin report ngaihthlak a ni a, dik lo taka pension lak a nih theihna tur hian Kohhran Pastor te hial pawhin dik lo taka certificate an oekchhuah thin thu a tarlang a, sim hmak a tul thu a sawi a, heng document lem lo siamsak thin te hi man theih an nih thu a sawi. Tun dinhmunah Champhai District ah Pensioner 1,361 an awm mek a, thla tin cheng nuaih 452 sing 2 sang 4 za 491 sawrkarin a seng a, family pensioner 547 an awm bawk a, thlatin cheng nuaih 134 sing 3 sang 7 za 331 sen thin a ni. September ni 30, 2026 thleng dik lo taka pension la te tan an pension surrender na hun hawn a ni a, hemi chun chhunga insurrender lote chu an chungah action lak a ni dawn a, insurrender te chu dik lo taka an lo lak tawhnaah ngaihdam an ni thung dawn a, mi engemawzatin an surrender mek thu a tarlang.

He hunah hian Resource Person Pu Albert Lalthansanga, Asst. Director, DLFA & P leh Pu PC Lalremruata, AA&AO, DLFA & P te hnen atangin pension dik lo taka lak in a nghawng theih te leh hrem theih an nih dan te chipchiar taka ngaihthlak a ni a, chhtianga pension la ten an pension an surrender a tulna leh pawimawhna te bakah Pension lak dan dik kalphung pawimawh tak tak ngaihthlak a ni. Resource personte hnen atang hian Family pension lak theih dan ngaihthlak a ni a, sawrkar hnathawk chu a thi a nih chuan family pension hi lak theih niin lak theih a nih dan ngaihthlak niin family pension la tura dan zawm ngai awm te ngaihthlak a ni a, zawhna leh chhanna hun hman a ni bawk