Vawiin khan UD&PA Champhai leh NSS Government G.M Higher Secondary School-te tangkawp buatsaihin Plastic hman thatlohna chungchanga inzirtirna hun neih a ni a. GM Higher Secondary School NSS ten khawpui chhung hmun hrang hrangah thuang 4 a insemdarhin bawlhhlawh thianfai hnatlang an neih bakah dawrkai leh mipuite hnenah UD&PA hnuaia Self Help Group te siamchhuah Paper Bag 600 chuang an sem nghal a ni.

He hun puala programme tawi CHANEM tualzawla buatsaih hi Pu F.Lalhriatpuia, JE UD&PA chuan a kaihruai a. Pu K.Lalhmuakliana DUDO Champhai chuan India rama Plastic hman a hluar lutuk chu   ngaihmawhawm tiin, nakin lawka keimahni leh kan tu leh fate tana harsatna siamtu ani thei a ni, a ti a. Champhai khawpuia Plastic hman thatlohna inzirtirna hun buatsaih a ni  chu lawmawm a tih thu leh Aizawla Palstic Micron 50 hnuai lam hman  khap anih ang hian Champhaiah pawh khap tuma hmalak mek a ni, a ti a. Plastic chu khawi hmunah pawh hmuh tur  a awm thu sawiin, Zirlai kalkhawmte chu Plastic hmang tlema midangte tihhmuhtu ni turin a chah nghal a ni.

He hunah hian Dr Lallawmkima, DIPRO Champhai pawhin Plastic hman thatlohna sawiin,  Plastic chu awlsam taka tawih ral mai theilo hnawm tam tak siamtu hriselna leh leilung tana harsatna siamtu anih thu a sawi a. Plastic hman chuan nghawng tha lo tak a neih hriain nikum World Environment Day thupuiah pawh ‘Beat Plastic Pollution’ tih  hman a lo ni tawh a ni, a ti a. Tuifinriatah kum tin Plastic ton maktaduai 8 chuang a luh ruih ruih thu leh hmalak anih loh chuan kum 2030 ah chuan Metric ton maktaduai 300 vel bawr a inchhekkhawl thei dawn a chhut  a ni, a ti bawk. UD&PA Department leh NSS GM HSS  hmalakna a khawpui chhung fangkuala Plastic hman thahlohna inzirtir ani leh  khawlai thianfaia hnatlang buatsaih  ani chu entawntlak a tih thu sawiin,  Plastic hman thatlohna chungchang chu mahni theuha nunpui bakah chhungkua, veng leh khuaahte a zau thei ang bera puangzar zel turin a chah a ni.

He hunah hian Swachhata hi Seva, 2019 puala fai nunpui tura intiamkamna leh Plastic atanga siam reng rengte hmang lo tura intiamkamna hun Pu C.Laltanpuia, Lecturer, GM Higher Secondary School kaihhruainain kalkhawmten an nei nghal bawk a ni.