Vawiin khan Mizoram Sawrkar hnuaia Industrial Development Board chu an Chairman Dr R.Lalthangliana, Commerce and Industries Minister leh Pu C.Ramhluna, Vice Chairman kahhruaiin Secretariat Conference Hall, MINECO- ah an thukhawm.

Dr R Lalthangliana chuan Mizoram Sawrkar hmalakna SEDP hlawhtlinna turin board peng hrang hrang din a nih thu leh chak taka kal a tul thu a sawi a. Kalphung leh ruangam dintu tur an nih angin member-te thahnemngai turin a sawm a ni.

Meeting-a agenda pawimawh an chhawpchhuah zingah Mizoram Industrial Policy (MIP) ennawn chungchang a tel a. Kum 1989, 2000 leh 2012 ah MIP siam a lo nih tawh dan sawiin Pu C.Ramhluna chuan GST a lo awm tak avang leh SEDP hmalakna avangin he policy ennawn leh siamthat chu sawrkarin tul a tih thu a sawi a. Meeting-ah hian Pu C.Ramhluna kaihhruai MIP drafting committee ten draft policy an chhawpchhuah chu pharh niin member-te thla khat chhung zirchianna hun an inpe a ni.

Industrial Development Board kaltlanga SEDP tanpuina dawngtu tur thlan dan inkaihhruaina (criteria) thlirho a ni a. Hna leh eizawnna dil theih, mimal thiamna nei te tana SEDP hnuaia trade hrang hrang dil theihte rawt ni bawkin chungte chu - carpentry, puan thui, beauticulture, lu meh, dawr siam (grocery/petty shop), thingpui dawr, thirdeng, pheikhawk siam, electronic repair, 2 wheeler workshop, automobile workshop, steel fabrication, alluminium works, handloom leh micro enterprise pawimawh dangte a ni a. Heng trade chhawpchhuahte leh inkaihhruaina hi a thuphunga pawm a ni a.  Mipui mamawh dan thlirin khaw hrang hrangah beneficiary te thlan chhuah tan theih thuai ni tawh se, tiin meeting-ah hian rawtna a lut a ni.

Annual Action Plan of National Bamboo Mission 2018-2019 in a pawm tawh industrial activities chungchang te, Industrial Development Board Chairman emaw Vice Chairman emaw kaihhruaina hnuaiah a kaihhnawih pawl hrang hrante nena inrawnkhawmna neih te, thlai thar sawngbawl dan kaihhnawihah Food Processing Unit leh Farming Society te thawhpui dan zawn chungchang te pawh vawiin meeting-a ngaihtuah zingah hian a tel a. Baktawng Alluminium Utensil Cluster-a Common Facility Centre siamna tur sum mamawh cheng vaibelchhe 4.85 chu State Level Project Steering Committee in a pawm tawh angin Mizoramin a do letna tur sum a tum theih nana State Sawrkara dilna thehluh chungchang pawh meeting-ah hian sawi a ni bawk. 10% Gross Budgetary Support atanga Mizoram tan sum hailuh a nih theih nan Ministry of DoNER chuan Mizoram Sawrkara Commerce and Industries Department chu thingpui leh mau sector-ah project proposal siam turin a hriattir a. Hemi kaihhnawiah Department-in Industrial Development hnena development project thlang chhuak tura  ngenna a thehluh chungchang pawh meeting-ah hian ngaihtuah a ni.