Mizoram Secondary school games vawi 37 na chu vawiin khan khar ani a, FCS&CA Minister Pu K. Lalrinliana chu khuallian niin he hun hi a hmanpui.

Khuallian chuan Mizoram Secondary school games hlawhtling taka zawhfel ani chu lawmawm a tih thu sawiin kolasib bialtu MLA  a nihna ang pawhin a tan thil chhinchhiah tlak tak ani a ti.

Minister chuan school games chu District hrang hrang atanga zirlai kalkhawm te tan inthianthatna leh inunauna pe tu nise zirna kawnga hmasawnna thlentu a nih a beisei thu a tarlang a. Mizoram Sawrkar in zirna leh infiamna a ngaih pawimawh thu sawiin Kolasib Saidan ah zirlai infiamna lama tuimi tan zirlai naupang 100 awm theihna tur (hostel attached) SAI Centre siam/ruahman mek a nih thu a tarlang a, peihfel anih hunah zirlai infiamna lama tui mite chu hmang tangkai turin a sawm a ni.

Infiamna chu taksa leh thluak sawizawi nana thil pawimawh tak a nih avangin hun bituk fel tak ruahmanin zirlai ten infiamna kalpui thin se tha a tih thu a sawi a. Ram leh Hnam intodelh leh hmasawn ni turin mahni theihna te in bihchiang a, ngaituahna sen a pawimawh thu a sawi a, Pathian ina Mizoram leilung malsawmna in a vur te hai chhuak thei turin mahni zirlai nunpui theuh turin zirlai kalkhawm te a chah bawk a ni.

Khual zahawm Kolasib Bawrhsap Pu Zoengsanga chuan zirlai te chu Ram nghahfak an nih avangin zirna kawngah tum mumal neia ke pen turin a chah a, infiamna chu taksa leh rilru hriselna thlentu a ni a, zirlai nuna thil pawimawh tak anih rualin zirna bahlah lo zawnga infiamna chu kalpui a pawimawh thu a sawi ani.
Pathian bakah mahni Nu leh Pa zahna chang hriat chu malsawmna thlentu a ni tiin zirlai hlawhtling ni tura kawng pawimawh tak Pathian tih a, mahni nu leh pa te zah fo turin zirlai te a chah ani.

October ni 22 atanga neih tan Mizoram Secondary School Games ah hian infiamna hlawm paruk heng Athletics, football, volleyball, hockey, judo, boxing ah te intihsiakna neih ani a a pumpui ah Aizawl District chuan Gold 13, Silver 11, Bronze 10 la in an Champion a, Lunglei District in Gold 13, Silver 2, Bronze 12 lain pahnihna an ni a, Serchhip District in Gold 6, Silver 6, Bronze 6 lain Pathumna an ni a, Games thlengtu Kolasib District in Gold 4, Silver 8, Bronze 9 lain palina an ni.