Vawiin atanga ni hnih chhung a bial fang kuala zin mek Lunglei West Assembly Constituency bialtu MLA leh Agriculture, Cooperation leh Irrigation and Water Resources Department-te changtu Minister ni bawk Pu C. Lalrinsanga chuan vawiin khan Sazaikawn, Vanhne, Thuampui, Lungdai S, Serte, Sertlangpui, Kawlhawk, Buarpui te a tlawh. Heng khua ah te hian khawtlang hmasawnna tura hnathawh tul hrang hrang a hmunah enfiahin sawrkar official-te leh khawtlang hruaitute hmalak dan tur a sawipui.

A khaw tlawh ah te Minister hi mipui thahnem takin lo hmuakin mipui, khawtlang hruaitute leh tlawmngai pawlte nen inkawmhona 'public meeting' hun tha tak an hmang a. A bial chhung ti hmasawn turin inkalpawhna kawng tha tak siam chu hna hmasaa a neih thu sawiin sawrkarin sum pawh ruahman mek zelin hmun hrang hrang ah hmalak tan nghal a ni a. Tin, kawng siam that mai piah lamah kawng dung awmsa pawh ngil (re-alignment) leh a chho ulh laite hrut hniam(lowering) hna pawh kalpui nghal anih tur thu sawiin Lunglei to Buarpui road chu 'intermediate lane' a ruahman niin kum 2022 ah zawhfel tum a ni a. Kuthnathawktute thlai thar phur chhuah leh sumdawnna atana kawng pawimawh tak ni tura ruahman mek a ni, a ti. Tin, PHE Department kaltlangin tui lakna ti hmasawn tura hmalak mek a nih thu a tarlang.

Agriculture lama hmalak tul te sawiin kan buh leh thlai enkawl naah chemical fertilizer leh hlo thahna damdawite kan hmang uar lutuk chu a vei takzet thu sawiin hengte hian kan leilung leh boruak a tih chhiat mai bakah mipuite hriselna thui takin a nghawng a ni, a ti a. Ram changkang zawkte tih dan leh mipui hriselna atana pawimawh tak ‘Organic Farming’ Mizoramah uar taka kalpui tum a nih thu a sawi a. Hemi chungchang hmalakna kal mekah tun thla khan khawvel pum huap Organic Farming chungchang zirhona 'International Workshop on Organic Policies' Germany -ah Agriculture Department official-te nen an zuk tel ve thu leh Delhi ah DoNER Secretary Dr. Inderjit Singh nen hmalak dan tur an ngaihtuah thu a sawi a. Organic leitha siam chhuahna hmunpui 'Bio Fertilizer Production Laboratory' leh thlai hnah/rah/zung atanga siam thlai hrik enkawlna damdawi siamchhuahna 'Biocontrol Pesticide Laboratory' te pawh din thuai tura hmalakna a kal mek thu a sawi bawk. Heng laboratory-te kaltlang hian mimal mahni kutkawiha eizawnna kawng dap thiam entrepreneurs - te promote tum a nih thu a tarlang bawk.

Kuthnathawktute tana sawrkar laipui scheme pawimawh tak kuthnathawktute pension scheme - Pradhan Mantri Kisan Mandhan Yojana (PM-KMY) chungchang sawiin he scheme hi loneitu kum 18 atanga 40 inkar te tana duan niin loneitute chuan thlatin sum chhunluh (premium) tlem te te a pe ang a, kum 60 a tlin hnuah thlatin pension a dawng ve thei tawh dawn a a tangkai hle dawn a ni, a ti a. PM-KMY hi Sawrkar laipui leh Life Insurance Corporation of India-te tangkawpa din a nih angin Pension hi LIC Pension Fund atanga pek chhuah thin a ni ang, a ti bawk.Tin, thlai insurance scheme - Pradhan Mantri Fasal Bima Yojana(PMFBY) te pawh Mizoramah kalpui mek niin heng kuthnathawktute tana hamthatna te hi DAO Office - ah ngaihven leh hmang tangkai turin khaw tinah mipuite a chah a. Tin, ni zung chakna hmang tangkaia tui pump chhuahna tura sawrkar laipui hmalakna PM-Kusum Scheme pawh Mizoramah kalpui tur niin tui pump 200 sanction hmuh tawh niin nasa zawka hmalak zel tum a nih thu a sawi. UNDP hnuaia Global Environment Facility leh sawrkar laipui hnuaia Rainfed Area Development te pawh kalpui zel tum anih thu a tarlang bawk.
 
Hmasawnna mamawh hrang hrang mipuiten a hnena an lo thlen te tih hlawhtlin ngei a tum thu sawiin mipuite pawh an mawhphurna hre renga sawrkar hmalaknate thahnemngai taka tawiawm a ti hlawhtling turin a chah a. A hmalakna ah te thurawn pe fo thin tur leh an mamawhte inthlahrung hauh lova thlen thin tura chahin mipui leh sawrkar official-te tawiawmna nen a mawhphurna te tha taka hlenchhuah ngei a tum thu a sawi.

Minister hi Lunglei Additional DC Pu David Liansanglura Pachuau, Lunglei DAO Pu Tlangtimawia Zote, DIPRO Pi C. Lalremruati, ARCS Lunglei Pu H. Lalnuntluanga, I&WR SDO Pu Lalbiakdika leh official dangte bakah sawrkar flagship program Socio Economic Development Policy (SEDP) hnuaia Agriculture Development Board member pathum - Pu Lalropuia Pachuau, Pu Lalsangliana Hnamte leh Pu Lalruatfela Colney te bakah khawtlang hruaitute leh party hruaituten an tawiawm a.  Minister leh amah zui tute hi zaninah Buarpui ah riakin naktukah Buarpui leh W.Bungtlang te an tlawh hnuah naktuk chawhnu ah Lunglei lam panin an haw leh ang.