Vawiin hian Serchhip khaw laili, P & E Venga Leisekawt Playground ah he Playground laihzauhna tur bul tanna inkhawm tawi buatsaih a ni a, Pu Robert Romawia Royte, Minister of State, Sports & Youth Services, Tourism, ICT, chuan khuallian niin a hman puia, bawngtuthlawha chekin hna bul a tan.

He inkhawm, Pu T. Zadingliana kaihhruaiah hian Minister chuan, Serchhip mipuiten an beisei Leisekawt Playground laihzauh hna tan theiha a lo awm ta chu lawmawm a tih thusawiin, Chief Minister zahawm tak Pu Zoramthanga leh Adviser to Chief Minister Pu C. Lalramzauva te hmalakna rah a nih thu a sawi a. A zauhna tur hmunhma neitu Rural Development Department changtu Minister Pu Lalruatkima chungah pawh lawmthu kan sawi a, an inpekna zarah Serchhip khaw lailiah Playground rotling kan neih phah dawn a ni a ti. Field laihzauh in a tih chhiat tur BDO staff quarters thar pariat sakna tur Rs. 372 Lakh pawh dah fel ni tawhin, Playground laih nan hian Rs. 195 Lakh dah a ni bawk a, khawl hman tur remchan dan a zirin naktuk atangin tan nghal mai kan duh tawh a ni a ti. Minister hian Paragliding Accuracy World Cup 2020 and Grand Festival leh Mizoram State Games, 2019 chungchang pawh kal khawmte hmaah a sawi lang a. Paragliding Accuracy Wolrd Cup 2020 and Grand Festival hi Serchhip in a thleng dawn a ni mai lova, Mizoramin kan thleng dawn pawh a ni ringawt lova, India ramin kan thleng dawn a ni. Khawvel ram hrang hrang atangin World Cuppper za tel rawn tel tura ngaih an nih avangin chung miten Serchhip leh a chhehvel an hmuh dan chu India ram an hmuh dan  a ni tawh mai dawn a, chuvang chuan Serchhip mipuite thawhpuina kan mamawh hle a ni, a ti bawk.

He hunah hian Pu C. Lalramzauva, Adviser to Chief Minister pawhin thusawiin, Serchhip mipuiten kan duh ngawih ngawih Leisekawt Playground laihzauh hna tan a ni dawn ta chu a lawm hle tih sawiin, Chief Minister zahawm tak hmalakna rah a nih thu a tarlang a, ram pum huap asset tling ngeia siam tum a nih thu sawiin, RD Department in khawtlang tana hman tangkai atana hmunhma an kian thei chu an fakawm hle a ni, a ti bawk.

He hunah hian Pu H. Biakzauva, MLA, Lawngtlai East bialtu pawhin thusawina hun a hmang bawk a ni.

Upa Vanlalchhunga, Chiarman, KTP General Conference, 2020 Organising Committee chuan inlawmna thusawiin, Leisekawt Field laihzauh chu KTP Conference  Organising Committee duhdan leh dil mai nilova Serchhip All NGO Co-Ordination Committee duh dan leh dil a nih thu a sawi a. KTP General Conference chuan a zar a lo zovin hman tangkai hman ngei a tum thu a sawi a. An beisei ang taka sawrkarin a hun taka kut a rawn thlak hman tur chu an hlim hle tih a sawi a ni.

Programme hmanzawh hian Minister chuan bawngtuthlawha chekin a laihzauh bul a tana, chumi hnuah Adviser to CM leh midangten an chek ve leh a. Chumi zawhah Rev. C. Lalrintluanga, Vice Chairman, Organising Committee chuan malsawm tawngtaiin hun a khar a ni.