Vawiin hian Serchhip Leisekawt Playground ah Pu Robert Romawia Royte, Minister of State, Sports & Youth Services, Tourism, ICT, etc chuan Press Meet a nei a, Serchhipa thuthar thehdarhtute hmaah Paragliding Accuracy World Cup 2020 and Grand Festival chungchang leh kan hma lawk December thlaa neih tur Mizoram State Games, 2019 chungchang hrilhfiahna a nei.

Minister chuan, Mizoram State Games neih tur hi Council of Minister in lungrual taka leh phur taka a pass a ni a, chak taka bawhzui niin State level Committtee din a ni a, budget ah Rs. 150 lakh dah  a ni. A tul anga la dah belh theih a ni bawk a. Sum te hi State Games Opening, Closing, Medal leh Organising Committee in tul bika hman tur a dah bak chu Constituency Level Committee hnenah pek vek a tum a ni, a ti a. State Games hi Constituency Level a inelna tur niin MLA tinte chu an biala Chairman an ni nghal a, an lo inbuatsaih bul tan nan Rs. 50000 theuh pek an ni ang a, an player rawn kal te chu TA/DA pek tum an ni, a ti bawk. Sports Association hrang hrang te chu an discipline theuhte technical thil buaipui tur leh competition organise tura beisei an ni ang, tiin discipline hrang hrang inelna neih dan tur a tarlang bawk.

A hun tur hi December ni 9 atanga ni 13 tinzawn a ni a, a hmun atan Aizawl khawpui chhung ruahman a ni a, AR Ground ah Contact Sports te a huhova pui taka competition neih tum a ni ang. Constituency zawng zawngte discipline tinah an inlan kim vek chuan players 15120 zet an fuan khawm dawn a, Gold Medal 403, Silver 403 leh Bronze 565 a awm thei bawk ang. Games hi 32 a awm ang a, Mipa events 132, hmeichhe events 88, a vaiin events 221 a awm thei dawn a ni. Opening Function leh Closing FUnction hi ropui tham taka buatsaih a ni dawn a ni.

Minister chuan, State Games chu infiammi tam tak tan intuaitharna hun tha a nih tur thute, Sports discipline kan tih ngai tawh meuh loh te kaihthawh lehna hun tha te, Mizo hnamzia tilang thei infiamna chawinun thar lehna hun tha atan tea hman a nih tur thu a tarlang bawk a ni.

Pu Robert Romawia Royte hian Paragliding Accuracy World 2020 and Grand Festival, nakkum 10-16th February, 2020 a Serchhip hmuna India ramin a thlen tur chungchang pawh sawi langin Serchhip khaw mipuite, chanchinbumite, tlawmngaipawlte thawhpuina a sawm a. Khawvel hmun hrang hrang atangin an ram aiawh phak thiau pilot za chuang an rawn kal dawn avangin Embassy tam tak mitin Serchhip leh Mizoram lam a rawn hawi dawn a, hneh tak, puitling leh fel fai tak, zawngchhang thlak an tih ngei tura kan lo thlen a pawimawh a. He hun hlu tak hian nakin zela Tourism lama kan ram hma a tieng hawk thei dawn a ni, a ti. He World Cup hi Serchhip in emaw Mizoramin kan thleng dawn a ni ngawt lova, India ramin Serchhipah a thleng dawn a ni. Chuvangin foreigner lokal ten India ram hi Serchhip ah an rawn hmu dawn a, Serchhipa an hmuh hi India a an hmuh a nih avangin engkimah kan inbuatsaih nasat a pawimawh hle dawn a, India aiawhin nangni hian World Cup khel thei Paragliding Pilot te in lo mikhual dawn a ni, a ti.

He mi atan hian sawrkarin ruahmanna a siam nasa tih sawiin, Serchhip Tourist Lodge te pawh tihchangtlun a tul tur thu te, Thenzawla Log Lodge/House te pawh thlen theiha peih hman a tul a rin thute, Serchhip khaw chhungah a thei leh tling tawk an awm chuan Home Stay te hial pawh buatsaih a tul theih thu a sawi lang a.  Paragliding tihna hmun remchang, India rama a tha ber te zinga mi nih tling Serchhip daia a awm hi a ngheta cheibawl tum a nih thute pawh a tarlang a, a thlawh chhuahna hmun bakah a tumna hmun nghet/ ram nghet pawh neih tum a nih thu a tarlang a  ni.

Minister hi chanchinbumite hian zawhna hrang hrang an zawt bawk a ni.

Minister in Press Meet a neih hi Adviser to Chief Minister Pu C. Lalramzauva leh Pu H. Biakzauva, MLA te, Pu PC Laltlanthanga, Secretary, Mizoram State Sports Council te, Pu K. Saitluanga, DIPRO ten an tawiawm a, Serchhipa thuthar thehdarhtute an kal tha hle a ni.