Vawiin chawhma khan Former Legislators Association of Mizoram (FLAM) chuan an kum 25 tlin lawmna hun Aijal Club, Aizawlah an hmang a Pu Tawnluia, Deputy Chief Minister chu khuallian a ni.

Khuallian Pu Tawnluia, Deputy Chief Minister chuan Former Legislators Association of Mizoram (FLAM) Silver Jubilee lawmna hmang thei tura MLA hmasa berte zinga mi 11 anlo tel thei chu lawmawm a tih thu sawiin FLAM chu inepna leh indaidanna awm lo, inlungrualna leh thahnemngaihna hnuaia ram hmasawnna ngaihtuahna hmun tangkai tak anih thu a sawi. Pu Tawnluia a chuan MLA chu ram kaihruaitu tura mipuiten an aiawh an thlan chhuah te annih avangin a thutthleng luahtute inthlak chang awm thin mah se ram leh a chhunga cheng mipuite hmasawnna tur ngaihtuah chu a pawimawh dan a ngai reng thin tur a nih thu a sawi a, mipui thlan tlin leh mipui aiawh anih avangin MLA dinhmun chu a zahawm hle a ni, a ti bawk. Deputy Chief Minister chuan sawrkarna chelh tum a inelna kawngah ram leh mipuite hmasawnna atan hmalak leh hnathawhna kawnga inel chuan hmasawnna a thlen thin thu a sawi a thuneihna leh lalna awh vanga thil tha lo pawisaklohna a awmloh nan FLAM memberte chu ngaihtuahna seng thin turin a chah bawk a ni.

Vawiin FLAM Silver Jubilee lawmna hi Pu KL Rochama, President FLAM in a kaihruaia, member boralte sunna hun hman niin Pu K Sang Chhum, Treasurer leh Pu TC Pachhunga, General Secretary ten report an pe a ni. He hunah hian Khuallian Pu Tawnluia chuan Pu Ch.Chunga (L) nupui Pi Rothangi hnenah chawimawina lehkha ziak a hlan a member kalkhawmte hnenah FLAM Silver Jubilee momento a hlan nghal bawk a ni. FLAM Office Bearers thlangin hun hman chhunzawm a ni a President Pu KL Rochama, Vice President Pu P Lalupa leh Treasurer ah Pu K Sang Chhum thlan nawn leh an ni.

FLAM hi 1994 khan din a ni a. Memberte ko khawm a a bul tantute chu Dr. Kenneth Chawngliana Ex-Speaker leh Pu TC Pachhunga Ex-MLA te an ni a hruaitu hmasaberte chu President ah Dr. Kenneth Chawngliana, Vice Presi­dent Pu R.Lalawia leh General Secretary Pu K.Sang Chhum te an ni.

FLAM tum bulpui berte chu ram leh hnam tana an theihna an lo hman tawhna atanga kawng tinrenga ram intodelhna leh hmasawnna atan te, remna leh muanna vawng him tur te, hnam inpumkhatna atan te, sik leh sa leh nungcha humhalh te, Democracy humhim zel te leh FLAM Memberte inpumkhatna leh thawhhona tha siam a, a tul ang zela an hamthatna tura hmalakte a ni.  FLAM Member ni theite chu MLA leh MP lo ni tawh te leh an nupui pasal thihsan tawh te an ni. FLAM member zingah MLA lo ni tawh 77 te leh MP 7 an boral tawh a member 151 awm mekin pensioners 104 leh family pensioner-47 te an ni.