Health & Family Welfare Minister Dr.R. Lalthangliana’n nimin tlai khan Eye Care Centre, Dawrpui South ah mit zaina khawl thar an bun ‘Centurion Vision System’ a hawng a, hemi hnu hian Eye Care Centre in an kum 20 tlin lawmna programme Hotel Floria an buatsaih chu a hmanpui nghal a ni.

Dr. R. Lalthangliana chuan Eye Care Centre in kum sawmhnih lai Mizoram mipui tan thawkin tunah khawl thar tha tak an neih belh leh chu a lawmpui tiin mit enkawlna kawngah Mizoramin bung thar a kai a ti a. Health & Family Welfare Department hna thawh chu mipui tih dam a nih avangin Lal Isua rawngbawl nen pawh a in ang hle a chuvangin Health Department chu Department pawimawh tak a ni, a ti. Damlo enkawlna kawngah tawngkam nem leh dam in damlo te chak zawkin hma a sawm tir thei tiin tawngkam hi fimkhur a pawimawhin inthlahdah lo a pawimawh a ni a ti. Khawl te hi lei mai a har avangin belhchian dawl leh tangkai thei ang ber lei a tul tih pawh a thusawi a Health Minister chuan a sawi lang a ni.

Eye Care Centre hian an kum 20 tlin lawmna programme chi khat atan Hmarchhak(Guwahati leh Silcahr) leh Kolkata atangin mit doctor thiam(eye specialist) 5 sawmin, heng mithiam leh Mizoram mit doctor pawl Ophthalmological Society of Mizoram te nen mit tha lo leh a natna enkawl leh tihdam chungchangah Scientific Session an hmang bawk a ni. Phai atanga eye specialist lokal te chu – Dr. R.C. Paul, Chief Surgeon, Susrut Eye Foundation & Research Centre, Kolkata; Dr, Nada Nadeem Ansari, Consultant, Susrut Eye Foundation & Research Centre, Kolkata; Dr. H.K. Chowdhury, Director, Chowdhury Eye Hospital, Silchar; Dr. B.J. Goswami, Chief Surgeon, Guwahati Eye Institute leh Dr, Sudip Chaudhuri, Refractive Surgeon, Implant House, Kolkata te an ni.