Ni 3 awh tur Mizoram chhim lam leimin dinhmun zir chianna ‘National Workshop on Landslide Hazard in Southern Mizoram’ chu vawiin chawhnu khan Dr. Vanlaltanpuia, MLA & Chairman Mizoram Youth Commission (MYC) chuan Lunglei Government College (LGC) Multipurpose Hall-ah a hawng. He Workshop pawimawh tak hi Mizoram Remote Sensing Application Centre (MIRSAC), Directorate of Geology & Mineral Resources, Lunglei Government College leh Geological Society of Mizoram te tawngkawp buatsaih a ni. 

Hawnna inkhawm Dr J. Malsawma, President, Geological Society of Mizoram kaihhruaiah MYC Chairman chuan thu sawiin, thupui pawimawh tak chungchang zirhona liantham tak National level hial Workshop buatsaih a ni chu lawmawm tiin kalkhawmten an hlawkpui theuh theihnan duhsakna a hlan a.  Leilung chhiatna tam tak kan tawh chhan hi 'leilung aw', leilung zai kan ngaih loh avang anih thu sawiin, mipuiah inzirtirna uar zel nise a ti a. Mizorama kan zirna in te leh zirlaite an intuaithar a tul zia pawh tarlangin, MYC Chairman chuan UPSC tling thei turin kan zirna siamthat a tul a ni, a ti bawk. 

He inaugural session-a khualzahawm, Dr. R.K. Lallianthanga, Chief Scientific Officer chuan leimin hi kan ramin kan la buaipui ber zel tur chhiatna a nih thu leh, hei hi kan ram leilungin a zir loh avang leh kan enkawl dan dik tawk loh avang a nih thu a sawi a. Kan rama harsatna kan neih hrang hrangte sukiang thei tur chuan, zirna in leh sawrkar department leh pawlte kan thawhho tlan a tul thu a sawi bawk. 

Directorate of Geology & Mineral Resources-a Jt. Director, Pu H. Lalbiakkima’n workshop chungchang sawizauna neiin, leimin chi hrang hrangte hi kan ramin kan tawh ve deuh vek thu a sawi.

Workshop hawnna inkhawm hi Geological Society of Mizoram President, Dr. J. Malsawman a kaihruai a. Leimin zirna kawnga tawnhriat nei thate hnen atangin thupui zirhona neih a ni a. Lunglei College Veng leh Zotlang leimin te a hmuna kalin zirhona an nei bawk. Workshop-ah  hian mi 70 chuang an tel thei a ni.