4132/2025-2026

Champhai, dated 23rd January 2026: District Level Awareness Programme on PM Vishwakarma Scheme chu vawiin khan I&PR Auditorium, CHANEM Building, Champhaiah neih niin Champhai Bawrhsap Pu Mohammad Aaquib chuan khualian niin hun a hmanpui.

He Awareness programme hi session hnihah then niin, PM Vishwakarma bakah MSME hnuaia scheme hrang hrang inhrilhhriatna hun hman a ni a. Khuallian Pu Mohammad Aaquib chuan PM Vishwakarma hi Mizo themthiamna hman tangkai theihna scheme tha tak a ni tih sawiin sawrkarin heng kuthnathawkte tan hian hma a la tha tih a sawi a, training tura lo kal khawm te chhawr tangkaia eizawnna mumal tak neihpui thei ngei turin duhsakna a hlan a ni.

PM Vishwakarma Scheme hian a tum ber chu India sawrkarin kutthemthiam in pho chhuah leh intundin nana an thiamthil hmang duh, sum leh pai nei lo bakah kalhmang hriat loh avanga ti thei lo te tanpui a ni a. Kutthemthiam leh hna thiamte tan training leh financial support pekte, an thil siam that zawng leh hralh tlak dan tihhmasawnte, Digital transaction leh e-commerce platform-a tanpuite, ₹3 lakh thleng loan, 5% interest rate-a pek te leh a dangte a ni. He scheme-ah hian ₹13,000 crore budget a nei a, kum 2027-28 thleng a awm ang.

Pu Samrat M. Jha, Assistant Director Gr-I i/c Br. MSME chuan thusawiin he scheme puala batti eng chhitna hun chu a kaihruai a. Sawm bik te hnen atangin PM Vishwakarma chungchang ngaihthlak a ni a, Technical Session in a zui a ni. Technical Session-ah hian Pu Lallawmkima, Lead District Manager, Champhai District chuan Financial Literacy & Banking Procedure for Setting up of Enterprises tih a zirtir a; Pu Lalnuntluanga, State Head, IPPB, Mizoram chuan QR Code generation for PM Vishwakarma Beneficiaries tih a zirtir a, Pu Samrat M. Jha, I.E.D.S., Assistant Director Gr-I i/c Br. MSME – DFO, Aizawl chuan MoMSME Scheme chungchang a zirtir a, Pu Lalthakima, YP, Br. MSME-DFO, Aizawl chuan Onboarding of PM Vishwakarma beneficiaries on URC/UAP chungchang a zirtir a, Pu Ramnundanga, Asst. Professor, Commerce Dept., Govt. Champhai College chuan digital marketing, digital literacy leh e-onboarding chungchang a zirtir a ni.

PM Vishwakarma hi Ministry of Micro, Small & Medium Enterprises (MSME), Ministry of Skill Development & Entrepreneurship (MSDE) leh Department of Financial Services (DFS) hnuaiah awmin Mizoramah chuan Commerce & Industries Department-in an enkawl a. He scheme hnuaiah hian kum 18 tling tawh, Sawrkar Laipuiin 18 traditional trades a tih zinga mi kuththemthiamna nei, sawrkar hnathawk ni lo chhungkua atangin mi pakhat theuh ziahluh theih an ni a. Central Sector Scheme niin loan hi cheng nuai thum thleng, interest rate hniam zawka lak theih a ni.

He awareness programme-ah hian Champhai District chhunga khaw hrang hrang atangin mi thahnem tak an lo kal a ni.