13/2024-2025 

Champhai, the 2nd April, 2024: Tun thla April ni 19, 2024 a neih tur General Election to Lok Sabha, 2024 a duty tur Polling Official-te tan vawiin khan Govt. GM Higher Secondary School, Champhai Vengsangah training thawhkhatna buatsaih a ni.

He hun hmanpuitu District Election Officer Pu James Lalrinchhana chuan General Election to Lok Sabha atan tun thla April ni 19 ah vote thlak a nih dawn thu leh hemi atana pawimawh tak Polling Official-te chu inthlan kaihhnawih enkawla buatsaihtu tur an nih avangin uluk taka thlan chhuah an ni, a ti a. DEO aiawha Polling Station-a duty tur an nih avangin training-te tha taka ngaithlaa bel taka thiam tum turin a fuih a. Election-ah thil thar a awm belh zel thu sawiin, inthlanna hmachhawn tawh avanga thiam tawh anga inngaih mai a that loh thu a sawi bawk.

Pu James Lalrinchhana chuan Polling Official-te chu ruihhlo leh a kaihhnawih laka fihlim tum tur leh inthlahdah hauh lo tura chahin, Dan palzutna a awm chuan kan enliam mai mai dawn lo, an chungah a tul anga hmalak zel a ni ang, a ti a. Webcasting hmangin Polling Station-a chetvelnate uluk takin ECI in a vil dawn thu sawiin, chetsual palh a awm loh nan tih tur leh tih loh turte hriat a pawimawh thu a sawi a. Mamawh leh tul angte hotute hnena thlen hreh lo tur leh hmanrua an dawnte tha taka chhiara belchiang turin a chah a. Training ngaipawimawh lova la thutak lote'n harsatna an tawh thin thu sawiin, inthlanna felfai tluang taka neih a nih theuh nan training chu bultanna hmasa a ni, a ti a. Kalkhawmte chu EVM hriat chian leh khawih dan pawh bel taka thiam tum turin a chah a. Midangte hrilhfiah thei tur khawpa training chhawr tangkai tum tur leh taksa leh rilru hriselna ngaipawimawh theuh turin a fuih a. Zawhna zawt tam tur leh hriat fiah tawk lohte hriatchian nana hman tum turin a chah a. Vote thlak huna duty turte chu Mock Poll atanga bultan that tum turin a chah nghal bawk.

Champhai District huamchhunga Assembly Segment pathum, 23-Champhai North AC, 24-Champhai South AC leh 25-East Tuipui AC ah Polling Station 84 a awm a. Hemi atan hian Polling Official mi 440 (Presiding Officer, Polling Officer I, Polling Officer II leh Polling Officer III atan Official 110 theuh) te ruat niin, first randomization neih zawh tawh a ni.

Polling Official training thawhkhatna hi ni hnih chhung neih tur niin vawiin khan Presiding Officer leh Polling Officer I te an training a. Naktuk hian Polling Officer II leh Polling Officer III te pual training buatsaih a ni ang.

He hunah hian Pi Lalhruaitluangi, SO/SLMT, Pu N. Lalzarzova, BDO Khawbung/ DLMT, Pu Moses Lalfakawma Tlau, SDC/ALMT leh Dr Vanlalnunpuii Ralte, SDC/ALMT te'n Polling party-te mawhphurna hrang hrang leh Postal Ballot chungchangte an zir tir bakah EVM chungchang an zir tir a ni.

General Election to Lok Sabha, 2024 atan hian Champhai District Assembly Segment 3 te chu Zone 13 ah then niin, Zone tinahte hian Sector Officer leh Sector Police Officer-te ngawrh takin an duty mek a. Election Expenditure Monitoring hnuaia team hrang hrang; Assistant Expenditure Observers, Flying Squad (FS), Static Surveillance Team (SST), Video Surveillance Team.(VST), Video Viewing Team (VVT), Accounting Team (AT), Media Certification & Monitoring Committee (MCMC), District Expenditure Monitoring Committee (DEMC) te bakah Enforcement Agency hrang hrangte'n inthlan senso leh MCC kenkawh chungchang an vil mek a ni.

February ni 8, 2024-a Final Electoral Roll tlangzarhin a tarlan dan chuan Champhai District-ah voter 57,454 an awm a. Heng zinga 28,018 hi mipa niin 29,436 hi hmeichhia an ni.