2346/2023-2024

Champhai the 17^th October, 2023 – November ni 7, 2023 a neih tur Mizoram Legislative Assembly Election-a Champhai District a duty tur Polling Officials te tan vawiin khan training GM Higher Secondary School ah training neih tan a ni.

Champhai District huamchhunga Assembly Constituency pathum – 23 Champhai North AC, 24 Champhai South AC leh 25 East Tuipui AC a Polling Station 84 a duty tur hian Polling Officials mi 452 ruat an ni.

Polling Officials-te training hi ni hnih chhung neih tur niin vawiin khan Presiding Officer-te leh Polling Officer I te an training a. Naktukah Polling Officer II leh Polling Officer III te an training ve leh dawn a ni.

Pi Lalhruaitluangi, Settlement Officer, Pu Lalrinawma Khiangte, SDO (S), Pu N. Lalzarzova, BDO Khawbung, Pu Moses Lalfakawma Tlau, SDC leh Dr Vanlalnunpuii Ralte, SDC ten Polling Official training-ah hian zirtirna an pe a. Polling Official te mawhphurna hrang hrang leh Postal Ballot chungchang te an zir bakah EVM chungchang an zir a ni.

MLA Election, 2023 atan hian Champhai District chu Sector 12 ah then niin 23-Champhai North ah Sector pali (4), 24-Champhai South ah Sector pathum (3) leh 25-East Tuipui ah Sector panga (5) a awm a. Heng sector-ah te hian Sector Officer leh Sector Police Officer te ruat fel tawh niin an duty chhuak mek tawh a. Election Expenditure Monitoring hnuaia team hrang hrang – Flying Squad, Video Surveillance Team, Static Surveillance team te chu duty chhuak tawh in, uluk takin Model Code of Conduct leh expenditure te an enfiah mek zel a ni.

Champhai District Final Electoral Roll, 2023 in a tarlan danin Champhai District ah Voter mi 57,180 an awm a, an zinga mi 27,880 te hi mipa niin, hmeichhe voter 29,300 an awm a ni.
 

Election Commission of India tirha Champhai District chhung Constituency pathum vil tura ruat Expenditure Observer Pu Abhishek J Jain chuan October ni 14 khan Champhai lo thlengin election insenso vil kawnga Champhai District hmalaknate a rawn enfiah a. Champhai District-a inthlan insenso chungchanga hriat fiah duh leh report duh nei tan Expenditure Observer Pu Abhishek J Jain hi 9233968789 ah engtiklai pawhin mipuiten an biak theih a ni.

Champhai District-a inthlan vil turin Election Commission of India chuan General Observer pahnih leh Police Observer pakhat a ruat a. 23 Champhai North AC, leh 24 Champhai South AC te vil turin General Observer atan Dr Ranjit Kumar Singh, IAS chu ruat niin, 25 East Tuipui AC General Oberver atan Shri Sanjay Kumar, IAS chu ruat a ni a. Shri Sukesh Kumar Jain, IPS chu election vuakveta Champhai District puma venhimna leh dan leh thupek kenkawhte enfiah turin Police Oberver ah ruat a ni. Heng Observer-te hi October ni 19-ah Champhai lo thleng hman tura beisei an ni.