2347/2023-2024

2023 Khuangchawi thla ni 17: Mizoram Legislative Assembly Inthlanpui 2023 lo awm tur atana Kolasib District chhunga assembly bial pathum - 4-Tuirial, 5-Kolasib leh 6-Serluia inthlan buaipui tura ruat, Presiding Officer (PRO) leh 1st Polling Officer (PO) te tana training thawh khatna chu vawiin khan Kolasib-a St John's Higher Secondary School-ah buatsaih a ni.

He training-ah hian State/District/Assembly Level Master Trainer paruk - Pu Lalremruata Sailo, SDO (Civil) Vairengte; Pi F. Lalnisai, BDO Thingdawl; Pu Henry Malsawmtluanga, BDO Bilkhawthlir; Pu Gilbert Lalhlimpuia, SDC Kolasib; Dr Lalramdintluanga, SDC Kolasib leh Pu Samuel Lalrinawma, Lecturer, DIET Kolasib te'n training hi an pe a. Chawhnu lamah EVM hman dan a taka zir hona buatsaih a ni bawk.

October ni 19, 2023 khian 2nd PO leh 3rd PO te tana training thawh khatna buatsaih a ni ve leh ang a. Ruahman lawk dan chuan PRO leh PO training hi thawh thumna thlengin buatsaih tum a ni.

Kolasib District chhunga assembly bial pathuma polling station 89 awmah inthlan buaipui turin PRO 1 leh PO 3 ṭheuh ruat an ni dawn a. He'ng PRO leh PO te an theih loh thulha an ai awh nghal thei tur thlaveng (reserve) atan mi eng emaw zat an awm a ṭul dawn bawk a. He'ng zawng zawng daih thei tur hian PRO leh PO tur eng emaw zat ruat tawh niin, a taka duty tur leh reserve tur te, an duty-na tur hmun te erawh chu ECI-in ruahmanna a siam angin thliar fel (randomise) a la ni dawn a ni.