Vawiin khan Champhai DC Conference Hall-ah Poshan Abhiyaan (National Nutrition Mission) hnuaia Rastriya Poshan Maah (National Nutrition Month) kalpui mek chungchang ngaihtuahho niin, hmalak zel dan turte sawiho a ni.  He meeting  Pu Zoremthara Ralte, SDO Sadar Champhai kaihhruaiah hian line department hrang hran aiawhte an tel a ni. Kumin Poshan Maah (National Nutrition Month) atana thupui thlan chu ‘Har Ghar Poshan Vyavahar (Change of Behaviour in each Home)’ - Poshan Maah hun chhunga hmalakna hrang hrang kalpuite hian a tha zawngin chhungkaw tinah chin dan tha a thlen ngei theihna turin hma i la ang u, tih a ni.

Pu Zoremthara Ralte chuan Sawrkar laipuiin a ngaipawimawh tak nu leh naupangte ei leh in thianghlim pek leh hriselna kawnga inzirtirna Poshan Abhiyaan kalpui tha  lawmman Champhai District-in a dawng thei chu lawmawm a tih thu  sawi a. Hemi Schme kaltlanga hmalakna reng rengte pawh sawrkar laipuiin a thlithlai chhunzawm reng a ni, a ti a. Poshan Abhiyaan kalpui tha District ni zel thei tura lungrual taka line department hrang hrang  leh khawtlang tanrual zel angaih thu sawiin, thawhhona tha tak hnuaia hlawhtling taka kalpui anih theihna tura tawiawm tlat turin a sawm a ni.

Pi WC Zorammawii, CDPO & Member Secretary, Block Level Convergence Committee on Poshan Abhiyaan chuan chaw tha ei leh hriselna kawnga inzirtirna thla National Nutrition Month (Rastriya Poshan Maat) hun chhunga hmalak dan tur hrang hrangte a tarlang a. Poshan Abiyaan chu India ramah March, 2018 atanga kalpui tan anih thu leh a tirah Mizoramah District zawng zawngte huam vek  lo mahse kumin atanga district zawng zawnga  kalpui tan anih thu a sawi a. Nikum lamah District thawk tha ber Champhaiin a hauh thu leh hemi kawnga line department leh khawtlang thawhhonaah lawmthu sawiin, kumin a kalpui mekah pawh thawhhona  tha tak  awm ngei theihnan thawktu zawng zawngte tawiawmna a ngen nghal a ni.

Meeting-ah hian Rastriya Poshan Maah (National Nutrition Month) hman hun chhung September Ni 1 atanga Ni 30, 2019 chhunga kartina thil tih dan tur hrang hrangte chipchiar taka sawiho niin, hmalakna hrang hrang neihnaah Member ten telpuia, a zau thei ang bera phochhuah thin nise tih a ni a. Rastriya Poshan Maah hun chhung hian kartin thupui hrang hrang  hawi zawnga hmalak thin tum a ni a. Kartin thutiam lak leh Home Visit-te neih thin tur niin, mipuite zitir kawnga Banner tarte leh hmalakna hrang hrang report leh thlalakte hun tiam chhung ngeia thehluhna tur Sawrkar laipuiin a buatsaih Jan Andolan Dashboard-ah te thawn zel thin tum a ni bawk. A karkhatna hun chhung hian line Department meeting, Village Health, Sanitation and Nutrition Day, Home visit, Community Based Event-te neih a ni tawh a. Ruahman dan chuan kar hnihna September Ni 12, 2019 (Nilaithawhtan) chawhnu dar 1 hian huapzau taka Poshan Rally Darthangvunga Traffic Point leh DK Traffic Point inkarah neih tum a ni a, hemi hnu hian Defeat Diarrhoea Campaign, Anaemia Prevention leh Hygiene and Sanitation Campaign-te neih tum a ni bawk.  A kar thumna hun chhung hian Thlai thar phochhuah, thianghlim leh hrisel zawka ei leh in siam entirna hun buatsaih tum a ni. A kharna September kar tawp berah chuan School Based Event huihawta, Zirlaite pualin Poster, Banner leh Slogan Writing-te a intihsiakna leh inzirtirna hun buatsaih   tum a ni a, heng bakah hian Early Childhood Care and Education (ECCE) kaltlangin Nau hnute pek pawimawhna leh hriat tur pawimawhte inhrilhhriatna hun neih leh tum a ni bawk.